Гульцам «Энергетыка» прачыталі лекцыю пра подкуп. Баяцца рэцыдыву?

У «Энергетыку-БДУ» – дзень асветы. Камандзе і трэнерскаму штабу прачыталі лекцыю пра тое, што браць грошы за патрэбны вынік – дрэнна і незаконна. Патлумачылі рызыкі, наступствы і паабяцалі адказнасць, усё як па падручніку.

Цікава, што размова вялась менавіта з гэтым клубам. Бо яшчэ ў 2023 годзе «Энергетык» трапіў у вялізны скандал і атрымаў жорсткія санкцыі ад АБФФ за дамоўныя матчы і неправамернае фінансавае стымуляванне. Тады мінчан пазбавілі ачкоў, узнагарод і шанцу з’ездзіць у еўракубкі.

Разам з імі на гутарку запрасілі і жаночую «Зорку-БДУ». Можа, проста каб не сумавалі?

На полі сітуацыя наступная: «Зорка-БДУ» трымаецца на 6-м месцы ў жаночым чэмпіянаце Беларусі з 42 ачкамі, да фінішу засталося тры туры. «Энергетык» сёлета з адрывам выйграў групу В Другой лігі, прайшоў дзве стадыі плей-оф і зараз рыхтуецца да паўфіналу з пінскім «Стэнлесам».