Ад гэтай каманды (не «Дынама») таксама залежыць, хто стане чэмпіёнам Беларусі. Ці здольная яна спыніць «МЛ»?
Ёсць аргументы што ў атацы, што ў абароне.
23 лістапада можа вызначыцца футбольны чэмпіён Беларусі-2025. У 17:45 адначасова стартуюць матчы «Дынама» Брэст – «Дынама» Мінск і «МЛ» – «Гомель». Калі сталічны клуб страціць ачкі, гэта зробіць «МЛ» чэмпіёнам аўтаматычна.
А вось калі мінчане перамогуць, то і «МЛ» для тытула спатрэбіцца перамога над «Гомелем». Здавалася б, гэта нескладана, калі сапернік з 9-га месца. Але табліца падманлівая: проста цяпер «рысі» – топ-сіла ЧБ, якая добрая і ў атацы, і ў абароне. Раскажам падрабязней, як гамяльчане паказваюць сябе на фінішы сезона.
28 чэрвеня ў 14-м туры «Гомель» без асаблівых шанцаў дома прайграў «МЛ» 0:2 – госці мелі поўную перавагу па статыстыцы. Іх касцяк з тых часоў амаль не змяніўся. Трэнаваў, праўда, Аляксандр Шагойка, але цяперашні коўч Міхаіл Марціновіч працягвае гуляць з базавымі наладамі папярэдніка пры мінімальным карэктаванні – пра гэта мы ўжо расказвалі.
А вось у «Гомеля» з моманту той паразы аснову перасабралі амаль напалову: са стартавага складу матча тры футбалісты ўжо пакінулі каманду, яшчэ пару страцілі стабільнае месца на полі. Змены пераважна адбыліся ў атацы, што нядзіўна. Гульня 14-га тура была восьмай, калі «рысі» не змаглі забіць, ды і ўвогуле тады мелі толькі 9 галоў – 0,64 за гульню.
Далей былі яшчэ паразы, і ў канцы лета «Гомель» з 19 ачкамі за 18 матчаў меўся на 12-м месцы. Хадзілі і чуткі пра звальненне галоўнага трэнера Андрэя Гараўцова.
Але восенню каманда паўстала зусім іншай. За 10 матчаў прагуляла толькі аднойчы – штосьці не пайшло ў Наваполацку з «Нафтанам» (3:5). Плюс забілі 18 мячоў, узялі шэсць перамог – да гэтага было толькі пяць – і 21 ачко, што на такім адрэзку аказалася другім вынікам ва ўсёй «вышцы».
За апошнія пяць матчаў гамяльчане прапусцілі ўсяго аднойчы – ад «Слуцка», калі ўжо вялі 4:0. Удалося стрымаць атакі трох каманд з цяперашняга топ-5 табліцы – мінскага «Дынама» (0:0), «Тарпеда-БелАЗ» (1:0), брэсцкага «Дынама» (3:0). І гэта яшчэ нейкім чынам не забілі «Арсеналу» (0:0), таму на адрэзку засталіся другімі па балах пасля «МЛ».
Але абароне «МЛ» трэба быць уважлівай – у цэлым за восень «Гомель» забівае 1,8 раза за гульню. Забяспечваюць гэта ў асноўным тыя, каго да лета ў складзе каманды не было.
24-гадовы нігерыец Райманда Адэола 5 жніўня зайшоў у «Гомель» у трэці раз у кар’еры. За наступныя 13 матчаў у ЧБ паспеў аформіць 5 галоў і 6 асістаў – з моманту далучэння афрыканца да сезона «вышкі» гэта найлепшы ў ёй паказчык. Хапіла і для таго, каб быць найлепшым у камандзе за ўвесь сезон. Дапамагае тое, што ў параўнанні з мінулым легіянер пачаў часцей падымаць галаву і бачыць сваіх партнёраў – гульня стала больш разумнай. Таксама Адэола паспеў патрапіць у недарэчныя гісторыі: разбіў броў аб штангу падчас гола, а чужая майка з нумарам з малярнай стужкі – папросту мем.
Ручная работа сезона ЧБ: форварда одели в футболку коллеги, сделав нужный номер из того, что было
Цяпер «Дынама» можа верыць у былых – Адэола гуляў за мінчан у 2024-м, як і Данііл Сілінскі. Але за мінулы і палову цяперашняга года 25-гадовы паўабаронца правёў толькі 8 матчаў – і 15 жніўня таксама вярнуўся ў «Гомель», дзе ўсе сустрэчы ЧБ праводзіць цалкам. Апорнік выконвае ролю крэатыўшчыка, маючы добрыя скілы ў пабудовах атак. Ужо паспеў вярнуць сябе 2023-ы: што тады, што цяпер за 13 матчаў за «Гомель» забіў чатыры разы. У гэтым верасні прыгожы стрэл Сілінскага ў матчы супраць «Нёмана» (3:1) нават стаў голам месяца ў «Гомелі».
Таксама ў жніўні каманда ўзмацнілася Аляксеем Анцілеўскім, які не прыйшлоў звонку – 23-гадовы вінгер першае кола чэмпіянату прапусціў праз разрыў «крыжоў». Цяпер жа замацаваўся ў старце і набраў ужо 3+1 за 13 матчаў – столькі ж было ў мінулым сезоне, але ў 28 гульнях. Дадатковая сюжэтная лінія супрацьстаяння з «МЛ» – там гуляе старэйшы брат Дзмітрый Анцілеўскі, які можа ўзяць другое беларускае чэмпіёнства ў кар’еры.
Асноўныя форварды ў абноўленым складзе каманды – таксама летнія навічкі, пара фактурных форвардаў палярнага ўзросту: 18-гадовы жвавы Цімафей Сіманенка ды 34-гадовы Дзяніс Лапцеў. Апошні часам выглядае вельмі нязграбным і непаваротлівым, але да экс-гульца зборнай вярнуліся галы – першыя пяць матчаў ён правёў без выніковых дзеянняў, а вось за наступныя шэсць аформіў 3+2. Да гэтага мячоў не было больш за год.
Годам без галоў Лапцеў на пару дзён пабіў свой «рэкорд» з даўніх часоў – вось як і дзе яго ставіў
У Сіманенкі ж безвыніковыя апошнія чатыры матчы, але за восем да таго паспеў назбіраць 4+1. Плюс форвард «моладзеўкі» зарабіў для «Гомеля» тры пенальці, што таксама добры ўнёсак.
Букмекеры ўсё адно ацэньваюць хатнюю перамогу «МЛ» над «Гомелем» у прыблізна 70%. Але калі моцы гасцей усё ж хопіць, каб павезці ачкі з Віцебска, а мінскае «Дынама» выйграе ў Брэсце, то чэмпіёнская інтрыга пойдзе на максімум. У 30-м туры сталічны клуб прыме «МЛ» – і гэта зможа быць ці фактычна матч за золата, ці гульня за шанц на дадатковы «залаты матч». Для абодвух варыянтаў «Дынама» трэба будзе, канешне, перамагаць.
Фота: прэс-служба «Гомеля»
Іншыя пасты карыстальніка
