Футбалісты «Мальёркі» закасплеілі Мадуру. Новы трэнд?

2026 год пачаўся з гучнай навіны. У ноч на 3 студзеня ЗША затрымалі ў Каракасе прэзідэнта Венесуэлы Нікаласа Мадура і яго жонку Сілію Флорэс. Абодвух аператыўна вывезлі ў Нью-Ёрк, дзе Мадуру амаль адразу прад’явілі абвінавачанні – ад наркатэрарызму і распаўсюду какаіну да захоўвання кулямётаў і выбуховых прылад «з мэтай нашкодзіць ЗША». Аперацыя выклікала бурную рэакцыю ў свеце, але нечакана зайшла зусім з іншага боку – у поп-культуру і спорт.

Яшчэ па дарозе ў Нью-Ёрк Дональд Трамп апублікаваў у сацсетках фота Мадуры. Завязаныя вочы, навушнікі і спартыўны касцюм Nike Tech Fleece. Здымак імгненна разышоўся – разам з ім літаральна ўзляцелі і продажы таго самага касцюма.

Трэнд хутка дакаціўся і да футбола. Перад матчам з «Жыронай» футбалісты «Мальёркі» прыехалі на стадыён у дакладна такіх жа камплектах Nike Tech Fleece. Аказалася, што ніякага схаванага сэнсу ці палітычнага меседжа ў гэтым няма – такія касцюмы ўжо даволі даўно з’яўляюцца каманднай формай. Але улічваючы новы кантэкст, у гульцоў атрымалася прыцягнуць да сябе ўвагу.

Толькі гэта ніяк не дапамагло ім на полі. «Мальёрка» саступіла «Жыроне» з лікам 1:2, а абарона каманды выглядала значна менш стыльна, чым іх праходка па калідорах стадыёна.

Пасля 18 тураў клуб з Пальмы-дэ-Мальёркі ідзе на 16-м месцы ў Ла Лізе – 18 ачкоў і небяспечная блізкасць да зоны вылету.