Фанат «МЮ» не стрыжэцца амаль 500 дзён – чакаў пятай перамогі запар. Не дачакаўся

Заўзятар «Манчэстэр Юнайтэд» Фрэнк Айлет паабяцаў не стрыгчыся, пакуль каманда не выйграе пяць матчаў запар. каманда не выйграе пяць матчаў запар. Свой чэлендж ён пачаў 5 кастрычніка 2024 года, тады «Юнайтэд» яшчэ ўзначальваў Эрык тэн Хаг. З таго часу мінула амаль 500 дзён і ніводнай стрыжкі.

7 лютага «МЮ» абыграў «Тотэнхэм» (2:0) у 25-м туры АПЛ – гэта была чацвёртая перамога запар. Да жаданай серыі заставаўся адзін крок.

«Кэрык у руля, валасы хутка знікнуць. Наступны – «Вест Хэм». Чатыры з пяці ёсць – упершыню з пачатку майго чэленджу мы выйгралі чатыры разы запар. Гэтым разам усё атрымаецца. Дзякуй Кэрыку – дзякуй, дзякуй, дзякуй», – казаў Ілет напярэдадні матча.

Але сцэнар аказаўся менш рамантычным. У сустрэчы з «Вест Хэмам» «чырвоныя» выратаваліся толькі ў канцоўцы – 1:1. Томаш Соучэк адкрыў лік на 50-й хвіліне, а Беньямін Шэшко зраўняў ужо ў дададзены час.

У гэтай серыі «МЮ» перамаглі нават лідараў – «Арсенал» і «Ман Сіці». І тым больш нечакана яны спатыкнуліся на «Вест Хэме», які знаходзіцца ў зоне вылету. Серыя перарвалася і эксперымент Фрэнка працягваецца.

ВІДЭА

Каманда Майкла Кэрыка набрала 45 ачкоў і паднялася на чацвёртае месца, апярэдзіўшы «Чэлсі» (44). У лонданцаў 24 балы і 18-я пазіцыя.

Сам Фрэнк яшчэ год таму быў нікому не вядомы. А цяпер праз ягоны чэлендж пытанні пра «валасатага фаната» рэгулярна гучаць на прэс-канферэнцыях – іх задаюць гульцам і галоўнаму трэнеру «МЮ». Нават Уэйн Руні прызнаўся, што гэта яго раздражняе:

«Я б адправіў яго на другі канец краіны – ён мне ўжо ўсю галаву вынес. Мы гаворым пра Кэрыка, пра тое, што «Юнайтэд» спрабуе выйграць пяты матч запар, а ўсіх хвалюе толькі прычоска гэтага хлопца. Паспрачаюся, ён і сам засмуціцца, калі «Юнайтэд» урэшце возьме пятую перамогу – бо раптам стане нікому не цікавы».

Калі Айлет усё ж дачакаецца пятай перамогі і сядзе ў крэсла цырульніка, свае валасы ён перадасць у Little Princess Trust – брытанскі дабрачынны фонд, які вырабляе парыкі для дзяцей, што страцілі валасы праз хваробу.