Брамнік збіў чайку мячом – капітан яе выратаваў, зрабіўшы непрамы масаж сэрца

Інцыдэнт адбыўся падчас фіналу плэй-оф першай аматарскай лігі Стамбула: каманды «Мевланакапы Гюзельхісар» і «Істанбул Юрдум Спор» змагаліся за выхад у новы дывізіён. На 22-й хвіліне брамнік «Істанбула» Мухаммет Уянік выбіў мяч наперад – і трапіў у чайку, якая ляцела над полем і адразу ўпала на газон. Спачатку кіпер не зразумеў, што збіў птушку, а калі падышоў бліжэй, засмуціўся:

«У той момант я быў у шоку. Мне было дрэнна. Я быў вельмі засмучаны, гэта глыбока мяне ўразіла. Урэшце, гэта таксама жывое стварэнне».

Капітан каманды Гані Катан адразу падбег да чайкі, каб аказаць першую дапамогу. Паводле яго слоў, птушка выглядала безжыццёвай і не дыхала, таму ён пачаў сэрцава-лёгкавую рэанімацыю. Непрамы масаж сэрца доўжыўся каля дзвюх хвілін. Праз некаторы час лапкі і вочы чайкі заварушыліся – і яна ўсё ж прыйшла ў сябе. Птушцы далі вады, пасля чаго перанеслі за бакавую лінію – там яе забраў медперсанал.

Катан прызнаўся, што не праходзіў курсаў па аказанні першай дапамогі – дзейнічаў інстынктыўна, спрабуючы выратаваць жывёлу.

Птушка атрымала пашкоджанне крыла і пакуль не можа лётаць. Яе ўзялі на лячэнне. Каментатар матча Онур Озсой расказаў, што многія гледачы пыталіся пра стан чайкі. Паводле яго слоў, падчас інцыдэнту ў эфіры панавала цішыня. Пазней здымачная група даведалася, што чайка зноў ходзіць, але ёй спатрэбіцца час, каб зноў навучыцца лётаць. Брамнік, які збіў птушку, заявіў: «Калі даведаюся, дзе яна знаходзіцца, падумаю пра тое, каб наведаць яе».

«Істанбул Юрдум Спор», дарэчы, прайграў, але для капітана важней, што чайка ўсё ж выжыла: «Мы страцілі чэмпіёнскі тытул, але дапамагчы выратаваць жыццё – гэта добра. Гэта было важней за чэмпіёнства».