За тыдзень клуб Шкурына «прыгаварыў» двух трэнераў. Адзін з іх (той, што зваў беларуса ў «Легію») нават атрымаў па твары
Каманда побач з еўракубкамі, але наш хлопец – толькі другі выбар на пазіцыі.
Ілля Шкурын прыходзіў у «Катавіцы», калі тыя пасля сямі тураў ішлі на перадапошнім, 17-м, месцы ў чэмпіянаце Польшчы. Трансфер з «Легіі» па ўсіх параметрах быў крокам на паніжэнне дзеля гульнявой практыкі, але ўсё крута перамянілася.
Цяпер ГКС адразу ў двух турнірах мае шанц зачапіцца за еўракубкі, а на мінулы тыдзень сваімі перамогамі паўплываў на трэнерскія адстаўкі ў двух сваіх канкурэнтаў. Адзін з коўчаў пасля паразы нават атрымаў па твары ад клубнага боса!
Расказваем пра варушняк вакол Шкурына і яго апошнія неадназначныя месяцы.
У Кубку паказалі найлепшы вынік з сезона-2003/04 – Шкурын там адзін з топ-бамбардзіраў
У Кубку «Катавіцы» добра выступалі ў 80-х і 90-х – тады ў прынцыпе былі значнай сілай у Польшчы, пяць разоў даходзілі да фіналу турніру і яшчэ тройчы бралі трафей.
Пасля вынікі былі куды больш сціплымі, але сёлета клуб ужо дабраўся да паўфіналу – першага з сезона-2003/04. Па дарозе каманда Шкурына абгуляла плоцкую «Віслу» (4:2 у дадатковы час), «Лодзь» з Д2 (2:1), «Ягелонію» (3:1) і «Відзеў» (1:1, 4:2 па пенальці). Ва ўсіх матчах беларус выходзіў у старце і забіў раз, два, тры мячы. На сёння толькі трое маюць больш галоў у турніры.
3 сакавіка ў 1/4-й з «Відзевам» Шкурын мог адзначыцца і чацвёрты раз, але кіпер суперніка выдаў суперсэйв (адзнака 3:53). Беларус быў заменены на 84-й ужо пры ліку 1:1 і пасля безвыніковых экстратаймаў назіраў за пераможнай серыяй пенальці з лаўкі.
Фота: афіцыйны сайт «Катавіцаў»
Цікава, што адразу пасля гульні быў адхілены ад працы харвацкі трэнер «Відзева» Ігар Ёвічавіч, які не пратрымаўся на пасадзе і пяці месяцаў. Афіцыйна яго не звольнілі толькі праз вялікую кампенсацыю. Паводле інсайдаў, клуб спадзяецца разарваць кантракт па пагадненні бакоў ці дачакацца часу, калі выплата стане меншай.
У міжсезонне Ёвічавіч атрымаў узмацненне ажно на 15,8 мільёна еўра, але плёну гэта дало мала – свой адрэзак трэнер скончыў ажно на 17-й пазіцыі ў зоне вылету. Параза ад «Катавіцаў», увесь склад якіх, дарэчы, ацэньваецца ўсяго ў 10,6 мільёна еўра, проста стала апошняй кропляй.
А «Катавіцы» рушаць далей і ў паўфінале 8 красавіка сустрэнуцца з «Ракавам» – былой камандай Шкурына.
На выходных паўдзельнічалі ў іншай адстаўцы – тут усё вырашыў фізічны гвалт
Ужо 8 сакавіка «Катавіцы» паехалі ў Радам, дзе перамаглі мясцовы «Радамяк» (1:0) партугальскага трэнера Гансалу Фею – таго самага, што яшчэ нядаўна трэнаваў «Легію» і асабіства зваў туды Шкурына. Беларус у матчы выйшаў толькі на 90+1-й і за 8 кампенсаваных хвілін нічым асаблівым не адзначыўся.
Фота: pressfocus.pl
Агулам вынікі «Радамяка» пасля вяртання з зімняй паўзы былі не найлепшымі (да «Катавіцаў» у пяці матчах было тры нічыі, а яшчэ параза і перамога), але як для серадняка, то не адбывалася нічога звышкрытычнага. Статусу Фею наўрад ці нешта пагражала бы і пасля няўдачы з «Катавіцамі», але адбыўся збег абставін.
Па-першае, партугалец глядзеў матч з ложы, бо адбываў там пяціматчавую дыскваліфікацыю. Падчас папярэдняй гульні супраць «Кароны» спецыяліст атрымаў бан і 20 тысяч злотых (прыблізна 5400 долараў) штрафу за тое, што на эмоцыях бяздоказна абвінаваціў суддзяў у карупцыі.
Па-другое, Фею быў вельмі незадаволены якасцю газона на хатнім стадыёне, пра што адразу пасля матча ў агрэсіўнай форме паведаміў чальцу гарадской рады горада Радама Дарыюшу Вуйцыку. А той, паводле слоў сведкаў, ударыў трэнера па твары.
Стан газону. Скрыншот: YouTube
Амаль адразу пасля інцыдэнту стала вядома, што Фею паведаміў гульцам пра сыход з «Радамяка», але публічна сітуацыю дагэтуль не пракаментаваў. Вуйцык жа заявіў, што партугалец назваў яго «сукіным сынам», дадаўшы, што «абразы – звычайная справа» для трэнера. Удар па твары чыноўнік апраўдаў самаабаронай.
«Я крыкнуў яму, што не хачу, каб ён называў мяне сукіным сынам, бо мая маці не такая жанчына. І ён пачаў набліжацца, нешта тлумачачы мне. Ён падышоў так блізка, што я падумаў, што ён зараз стукне мяне галавой. Я інстынктыўна закрыў твар рукой, але, на жаль, мы былі вельмі блізка, і я лёгенька дакрануўся шчакі трэнера Фею», – выклаў сваю версію Вуйцык.
Цяпер справай займаецца польская паліцыя, а партугалец ужо афіцыйна пакінуў клуб.
Што да «Катавіцаў», то яны падняліся на 9-ы радок Экстракласы, маючы 33 балы пался 23 сустрэч. Каманда Шкурына мае яшчэ і матч у запасе і ўсяго пяціпунктнае адставанне ад зоны Лігі канферэнцый. Калі ўлічваць шчыльнасць чэмпіянату і форму, то ГКС цалкам пад сілу пазмагацца за еўракубкі і праз лігу. Клуб ідзе 3-м у Экстракласе па колькасці набраных балах у апошніх 5, 10 і 15 матчах.
Сам беларус пакуль у статусе запаснога, але забівае больш за канкурэнта
Галоўны трэнер «Катавіцаў» Рафал Гурак мае даволі стабільную сістэму: Шкурын – безальтэрнатыўна асноўны форвард у Кубку, але ў чэмпіянаце значна часцей выходзіць на замену.
Агулам беларус правёў ужо 20 матчаў за ГКС, але ў старце выйшаў толькі ў васьмі (чатыры ў Кубку), аформіўшы 5+1 па «гол + пас». На мяч сыходзіць 168 хвілін, на выніковы бал – 140. Калі залічыць яшчэ зароблены пенальці ў якасці галявой – 120.
Фота: афіцыйны сайт «Катавіцаў»
Пры гэтым славенскі канкурэнт Адам Зрэлак за гэты ж перыяд мае 14 выхадаў на поле (12 з іх – у старце) і выбіў толькі 2+1. Пры Шкурыне на гол ён траціць 451 хвіліну, а на выніковы бал – 300.
Чаму пры горшых паказніках перавага ўсё адно аддаецца Зрэлаку?
«Катавіцы» ў прынцыпе даволі спецыфічная каманда, у топ-3 бамбардзіраў якой, напрыклад, знаходзяцца два цэнтральныя абаронцы. Цэнтральны нападнік у стылістыцы Гурака не заўсёды пра галы, але пра якасную працу ў адзінаборствах. Сілавы Зрэлак пасуе пад гэтыя мэты: любіць пазмагацца і на другім паверсе, і ўнізе, умее якасна прытрымаць мяч.
Пры гэтым дадатковыя паказнікі сведчаць, што па эфектыўнасці ў адзінаборствах у Экстракласе Шкурын не горшы, вось толькі ўступае ў іх не так часта. Што да пошуку свабоднай прасторы, адкрыванняў за спіну і выніковасці, то беларус тут відавочна мацнейшы.
Тым не менш Гурак пакуль робіць выбар на карысць славенца і мае профіт у абодвух турнірах. Але заўсёды ігнараваць няроўную выніковасць форвардаў наўрад ці атрымаецца – і зараз добры момант для Шкурына, каб перад фінальнай часткай сезона змяніць размеркаванне часу на сваю карысць. Абодва нападнікі маюць прыкрыя «сухія» серыі (Зрэлак не забіваў 499 хвілін, а Шкурын – 312). Хто сваю спыніць першым, можа атрымаць сур’ёзную фору ва ўнутраным змаганні.
Іншыя пасты карыстальніка
