Брэсцкае «Дынама» падпісала бразільца – ва Узбекістане ён запомніўся эпічным голам

Брэсцкае «Дынама» абвясціла пра падпісанне гадавога кантракта з 26-гадовым бразільскім абаронцам Гільерме Гедэшам. Футбаліст – выхаванец «Грэміа». За асноўную каманду аднаго з топ-клубаў Бразіліі ён правёў 16 матчаў і набраў 1+1 па сістэме «гол+пас». На радзіме таксама выступаў за «Понтэ Прэта», «Шапекоэнсе», «Жувентудэ», «Іпірангу» і «Амерыку Натал». Акрамя таго, Гедэш мае досвед выступленняў за зборную Бразіліі U20 – праўда, усяго адзін таварыскі матч супраць аднагодкаў з Мексікі.

Бразільскі абаронца падпісаў кантракт з брэсцкім «Дынама»

Апошнім клубам Гедэша быў узбекскі «Навбахор», за які абаронца правёў 30 матчаў і забіў чатыры галы. Адзін з іх атрымаўся сапраўды эфектным: на 96-й хвіліне матча супраць «Нефтчы» бразілец забіў ударам праз сябе і вывеў каманду ў 1/8 фіналу Кубка Узбекістана-2025/26. Праўда, далёка па турніры «Навбахор» не прайшоў – ужо ў чвэрцьфінале каманда разгромна саступіла «Сагдыяне» (0:4).

Пры гэтым нядаўна абаронца мог апынуцца ў чэмпіянаце Кыргызстана. Гедэша ў статусе свабоднага агента падпісаў «Тактагул» – пра гэта каля тыдня таму паведамлялася ў інстаграм-акаўнце Жогорку Лігі. Аднак бразілец так і не выйшаў на поле за новую каманду, пасля чаго падпісаў кантракт з брэсцкім «Дынама».

Ці дапаможа Гедэш брэсцкаму «Дынама» ў новым сезоне чэмпіянату Беларусі – пакажа час.