У Беларусі вось-вось стартуе першая ліга – якая ж там блытаніна з фаварытамі! Ці не палова каманд хоча пазмагацца за павышэнне
Гэта вам не «МЛ» і ўсе астатнія.
Сёлетняе камплектаванне робіць «МЛ» адзіным відавочным фаварытам на чэмпіёнства ў «вышцы». Прынамсі, ростар мінскага «Дынама» на паперы выглядае адчувальна слабейшым, а гаворка пра іншыя каманды ў катэксце золата ўвогуле не вядзецца.
«Только одна команда претендует на золото». Владелец «МЛ» – о чистке состава и планах на сезон
Затое ў першай лізе ці не палова клубаў прэтэндуе на павышэнне – хто на словах, хто па дзеяннях. Ёсць, канешне, вузкае кола больш стабільных фаварытаў, але ёсць і іншыя каманды, здольныя замахнуцца на Д1.
Смаргонцы ў мінулым сезоне правалілі першае кола, набраўшы ўсяго 8 балаў, затое ў другім узялі ажно 20 балаў (10-ы паказчык у лізе) і да апошняга тура маглі захаваць прапіску ў Д1. У выніку патрапілі ў стыкі і нават там ад «Белшыны» вылецелі толькі ў серыі пенальці.
Пасля паніжэння каманда страціла адразу дзевяць чалавек з 20+ матчамі ў мінулым сезоне. Сярод іх Андрэй Леўкавец, Крысціян Інстаен і Максім Яблонскі – усе выходзілі на поле з капітанскай павязкай.
Фота: тэлеграм-канал «Смаргоні»
Тым не менш «Смаргонь» захавала трэнерскі штаб на чале з Сяргеем Дараховічам і аформіла шэраг адметных трансфераў. Напрыклад, да каманды далучыўся расійскі форвард Арцём Архіпаў, экс-футбаліст «Дняпра», які ў міжсезонне мог падпісацца з «Нёманам».
З Гродна ўдалося ўзяць у арэнду двух маладых: 20-гадовага нападніка Арцёма Дзевяценя, які ўжо мае досвед у «вышцы», і 18-гадовага Максіма Аўтко – экс-цэнтрбэка АБФФ U-19 і зборнай таго ўзросту. Яшчэ смаргонцы актыўна працуюць па лідарах першай лігі і расійскаму мінору.
Яшчэ адна асаблівасць – спарынгі, якія ў большасці сваёй праходзілі супраць каманд «вышкі». Падапечныя Дараховіча паспрабавалі свае сілы супраць «Іслачы» (0:0), «Мінска» (1:0), «Нафтана» (3:2) і нават «МЛ» без зборнікаў (2:4) – атрымалася някепска.
Афіцыйна задачы «Смаргоні» яшчэ не агучваліся, але, выглядае, каманда можа пазмагацца і за золата.
Мінулы сезон у вышэйшай лізе скончыўся для «Маладзечна» поўным турнірным правалам і рэпутацыйным крахам для дырэктара Віталя Пачкоўскага. Паводле гульцоў, ён падманваў з кантрактамі – выплачваў толькі палову заробку траўмаваным і штрафаваў за кепскія вынікі.
Кто стоит за бардаком в «Молодечно»: после вылета дают зарплаты больше, чем в высшей лиге
Фота: тэлеграм-канал «Юні Ікс Лабс»
І ўсё ж пад першую лігу ўдалося сабраць даволі цікавы склад: падпісалі са «Смаргоні» Максіма Яблонскага, а з «Мінска» – Эдуарда Жэўнерава. Таксама запрасілі тых, хто зарэкамендаваў сябе ў міноры: з чэмпіёнскіх «Баранавічаў» перайшоў Станіслаў Атрашкевіч (гуляў у старце), а з «Дняпра» – Арцём Міраеўскі і Красімір Капаў.
Нейкім чынам, нягледзячы на хаос у клубе падчас мінулага сезону, на працяг кантракта пайшоў і галоўны трэнер Павел Бацюта, але не паспела скончыцца міжсезонне, а Пачкоўскі яго звольніў. Прычына – нібыта ў кепскіх выніках кантрольных матчаў.
Цяпер за тыдзень да старту лігі за «Маладзечна» ў якасці выканаўцы абавязкаў узяўся 27-гадовы Сямён Хаткевіч, які ўжо працаваў у аналагічнай ролі кавалак мінулага сезона. Яго па паўнавартаснай аснове можа замяніць Аляксандр Бразевіч.
З такім складам і дасведчаным трэнерам можа спакойна біцца за павышэнне, але хто ведае, што яшчэ выкіне кіраўніцтва. Дарэчы, Пачкоўскі публічна пра задачы нічога не казаў, але адзін з навічкоў прызнаваўся, што гульцоў падпісваюць пад вяртанне ў «вышку».
«Слуцк» пайшоў адваротным шляхам: захаваў большасць гульцоў з мінулага сезона і зрабіў кропкавыя узмацненні. З «МЛ» прыйшоў Артур Чудук, са «Смаргоні» ўзялі Уладзіслава Чабатара, з «Нафтана» падпісалі Ігнація Сідара.
Фота: афіцыйны сайт «Слуцка»
Таксама вылучаецца трансфер Арсеня Канцадайлава, які раней пагуляў на ўзроўні «вышкі» і браў Д2 з «Арсеналам» у сезоне-2023, аформіўшы 4+14 у 16 матчах. Апошнія гады паўабаронца правёў у DMedia, але ўсё яшчэ выглядае моцным футбалістам для першай лігі. Не дарма ў міжсезонне ён доўга праходзіў прагляд у «Арсенале».
Мінусам каманды можа стаць не вельмі дасведчаны трэнер. 34-гадовы Аляксандр Гардзейчык раней працаваў толькі ў дублі случчан, а яшчэ асістэнтам у петрыкаўскім «Шахцёры» і самім «Слуцку».
Афіцыйнай задачы ад случчан таксама не гучала, але з такім складам трапленне ў медалі – базавы мінімум.
«Паперпрам» – адзін з нешматлікіх клубаў, што адкрыта заяўляе пра планы на сезон: з нагоды 10-годдзя існавання хоча выйсці ў «вышку». Ці ёсць для такіх планаў хоць нейкія падставы?
Фота: тэлеграм-канал «Паперпрам»
Па-першае, гамельчукі амаль цалкам захавалі склад, якому ў мінулым сезоне не хапіла ўсяго чатырох пунктаў да стыкавых матчаў.
Па-другое, узялі некалькіх экс-гульцоў «Маладзечна» і «Дняпра». Гучных для першай лігі трансфераў няма, але за тройку каманда можа пазмагацца. Падняцца вышэй будзе вельмі складана.
«Энергетык-БДУ» ў мінулым сезоне з лёгкасцю прайшоўся па Д3 і зімой стаў «СКА-1938». Пры гэтым за зіму каманда амаль не змянілася.
Ні ў сацыяльных сетках, ні на сайце «СКА-1938» цягам міжсезоння не павядамляў ні пра падаўжэнне кантрактаў, ні пра новыя падпісанні. Паводле партала Trasfermarkt, за ўсю зіму ў камандзе адбыліся чатыры трансферы: два на ўваход і два на выхад.
Фота: тэлеграм-канал «Дынама» Мінск
Галоўны трэнер Аляксей Мяркулаў пацвярджаў, што задаволены касцяком мінулага сезона. Таму ў Д2 клуб збіраецца гуляць ростарам, сярэдні ўзрост якога складае 20 гадоў, – такая філасофія.
На пачатку міжсезоння спецыяліст казаў пра «максімальныя задачы».
Тут афіцыйна стаіць задача выхад у Д1. Праўда, міжсезонне ўдарыла па пятай камандзе Д2-2025. «Ліда» пазбавілася аднога з найлепшых асістэнтаў лігі ліберыйца Ціта Ёрмі (6+14 у 31 матчы), які пайшоў у «Нёман», і топ-бамбардзіра Аляксандра Бурноса (20+3 у 31 матчы), які далучыўся да «Віцебска».
Страты ў атацы трэба было неяк запаўняць, але значных для першай лігі гульцоў «Ліда» падпісвала толькі ў лінію абароны. З «вышкі» прыйшлі цэнтрбэкі Аляксандр Пазняк са «Слуцка» і Аляксей Лягчылін з «Нёмана». Пра астатніх футбалістаў-навічкоў вы наўрад ці чулі.
Фота: тэлеграм-канал «Юні Ікс Лабс»
Яшчэ ў мінулым сезоне ў «Юні Ікс Лабс» былі сур’ёзныя фінансавыя праблемы: гульцам некалькі месяцаў не прыходзілі заробакі, стаяла пытанне пра існаванне. Цяпер жа сітуацыя стабілізавалася.
Па інфармацыі «Трыбуны» перад камандай стаіць задача захаваць прапіску ў Д2, але некаторыя гульцы агучваюць больш сур’ёзныя намеры. Былы абаронца БАТЭ і зборнай Беларусі Максім Валадзько лічыць, што «можна не саромецца ставіць сабе высокія задачы ў выглядзе чэмпіёнства і выхаду ў вышэйшую лігу».
У чым прычыны такога аптымізму – загадка. У міжсезонне Валадзько так і застаўся самым зорным навічком калектыву, а камплектаванне прыватнікаў адбывалася перважна праз учорашніх сераднякоў Д2. З вышэйшай лігі ў «Юні Ікс Лабс» не прыйшоў ніхто.
У пінскай каманды даволі статусны трэнерскі штаб. Галоўным у новым сезоне будзе Андрэй Пракапюк, які да таго доўга працаваў у штабе брэсцкага «Дынама» (і нават галоўным пабыў крыху), а таксама правёў больш за 100 матчаў на чале «Нівы».
Фота: тэлеграм-канал «Хвалі»
Пры гэтым асіставаць яму будзе Аляксандр Храпкоўскі, які яшчэ ў 2024-м браў золата Д2 з «Маладзечнам». Менавіта памочнік і назваў, што «Хвалю» сярод прэтэндэнтаў на выхад у вышэйшую лігу.
Сярод навічкоў – пара гульцоў з аўсайдараў мінулага сезона Д1 і гульцы першай лігі. Самым яркім трансферам выглядае Яраслаў Арашкевіч, які першае кола мінулага сезона правёў у «Арсенале», а потым застаўся без клуба. 25-гадовы ўніверсал мае ўжо 100+ матчаў у «вышцы»: пагуляў за БАТЭ, брэсцкае «Дынама», а таксама меў досвед у Босніі.
Іншыя пасты карыстальніка
