«Матч з Беларуссю назаўжды застанецца самым вялікім правалам». Датчане аддалі месца на ЧС чэхам, але іх не адпускае іншае

У аўторак зборная Даніі прагуляла Чэхіі ў серыі пенальці і пазбавілася шанцаў патрапіць на чэмпіянат свету-2026. Заўзятары краіны ў лютасці ад правалу ў кваліфікацыі і патрабуюць адстаўкі галоўнага трэнера Брыяна Рымера, а яшчэ актыўна пішуць пра Беларусь!

Чым жа «завінаваціліся» нашыя футбалісты, якія ўжо амаль як паўгода за мундыяль не змагаюцца? Усё відавочна. У лістападзе 2025-га зборная Беларусі правяла, бадай, найлепшы матч пры Карласе Алосе. У кваліфікацыі на чэмпіянат свету згуляла 2:2 у гасцях якраз са звышматываванай Даніяй, якая праз перамогу магла амаль гарантаваць сабе выхад на топ-турнір.

Калі б датчане хаця б мінімальна перамаглі беларусаў, то ў апошнім туры супраць шатландцаў маглі сабе дазволіць згарэць нават з розніцай у тры мячы.

У выніку нічыя на «Паркене» стала ключавой, а потым Данія прагуляла Шатландыі 2:4 – з легендарным голам Скота Мактомінея праз сябе, якому пазней на Радзіме прысвяцілі мурал.

Дзякуючы беларусам і гэтым шалёным галам Шатландыя ўпершыню з 1998 года едзе на мундыяль

Фота: instagram.com/scottmctominay

Тады скандынаўская зборная змарнавала свой самы лёгкі шанц адабрацца на ЧС, але другое месца не было прысудам, а дало магчымасць згуляць у стыках за ЧС з іншымі еўразборнымі.

26 сакавіка Данія без праблем разабралася з Паўночнай Македоніяй 4:0. Далей у суперніках былі чэхі, якія ледзь прайшлі Ірландыю па пенальці (2:2, 4:3).

І вось 31 сакавіка матч у Празе скончыўся 2:2 у асноўны час, а потым Данія завалілася ў 11-метровых – 1:3. Такім чынам чэхі едуць на першы ЧС за 20 гадоў, а датчане ўпершыню за тры розыгрышы засталіся без пуцёўкі.

Галоўны трэнер Рымер адразу пасля паразы прыгадаў матч з беларусамі. «Я цалкам згодны, што цяпер, з далёкай будучыні, той матч бачыцца ключавым. Вось там і пачынаюцца праблемы. З тых часоў у нас былі два складаныя выязныя матчы супраць Шатландыі, а цяпер і супраць Чэхіі, і ясна, што ў гэтых матчах – мы ўсе можам пагадзіцца – шанцы былі прыкладна роўныя. Але гэта (выхад на ЧС – заўв. «Трыбуны») не адбылося на «Паркене» (супраць Беларусі – заўв. «Трыбуны»), і гэты матч будзе нас пераследваць», – канстатаваў коўч.

Фота: bold.dk

Многія дацкія заўзятары згодныя, што менавіта ў матчы супраць каманды Алоса іх футбалісты атрымалі ключавы ўдар ўсёй кваліфікацыі, але Рымеру ад гэтага менш не насыпаюць.

«Гробаная» Беларусь

«Гэта проста ганьба. Самая лёгкая група адбору ў гісторыі. Абуральна наймаць гэтага трэнера. Хатні матч супраць гробанай Беларусі, дзе можна гарантаваць кваліфікацыю. Выязны матч супраць Шатландыі. Выязны матч супраць нікчэмнай Чэхіі. Цяпер мы можам сесці з італьянцамі і назіраць за тым, як такія магутныя каманды, як Кюрасаа, Гаіці, Іарданія ды іншыя футбольныя дзяржавы разгортваюцца на самай вялікай футбольнай арэне».

Shadows, bold.dk.

Апошні шанц

«Пасля правалу з Беларуссю Рымер атрымаў некалькі дадатковых шанцаў, хаця заслугоўваў звальненне. Цяпер жа ён змарнаваў ужо тры шанцы. Ён не зможа вытрымаць такое».

hey2023, bold.dk.

Раней трэба было думаць

«Рымер нават без уліку цяперашняга выніку мусіў прайсці далей [на ЧС] яшчэ пасля Беларусі».

Jesus Q, bold.dk.

Фота: bold.dk

Галоўны правал у гісторыі

«– Хатні матч з Беларуссю назаўжды застанецца самым вялікім правалам у гісторыі.

– Згодны. Тады, пасля паражэння дома ад Арменіі [0:4 у адборы на ЧС у 2013-м], я думаў, што перасягнуць гэта немагчыма. Аднак Браяну Рымеру ўдалося».

Адказ Stankovich на каментар ананіма, bold.dk.

Салідарнасць

«Хатні матч супраць Беларусі стаў самым вялікім правалам у гісторыі дацкага нацыянальнага футбола на сёння. Зусім неверагодна, што яны не змаглі абгуляць нікчэмную каманду на «Паркене», дзе перамога забяспечвала выхад на чэмпіянат свету».

hey2023, bold.dk.

Гэта футбол

«Мы лепшыя за Беларусь, лепшыя за Шатландыю, лепшыя за Чэхію. Але мы не можам іх перамагчы».

Nizzen, bold.dk.

Фота: bold.dk

«Як ні круці»

«Як ні круці, усё зводзіцца да хатняга матчу супраць Беларусі. Гэтая гульня – найбуйнейшы правал у гісторыі дацкага футбола, улічваючы яе важнасць і тое, наколькі нікчэмным быў супернік».

hey2023, bold.dk.

125-я Беларусь

«Браяна Рымера немагчыма слухаць, мы займаем 20-е (насамрэч 24-е – заўв. «Трыбуны») месца ў рэйтынгу ФІФА, таму, вядома, крытыка будзе, бо ў яго і гульцоў было тры магчымасці выгуляць. Мы маглі б проста абгуляць Беларусь са 125-га месца ў свеце (насамрэч 98-га – заўв. «Трыбуны»)».

Fedepeden, bold.dk.

Гэта ўжо не народная зборная

«Матч супраць Беларусі стаў сімвалам фанабэрыі на вяршыні дацкага футбола… Гэта ўжо не народная нацыянальная зборная – гэта нацыянальная зборная DBU…»

1917SIF, bold.dk.