Замежнікі з мінулага ЧБ раз'ехаліся па Еўразіі: перавышэнне выніку з «МЛ» за шэсць матчаў, беларускі трэнер, дэбют за зборную
Плюс вечны бан, але не для футбаліста.
Пасля чэмпіянату Беларусі-2025 з яго сышло колькі заўважных легіянераў. Паглядзелі, куды яны ўладкаваліся і як прыўляюць сябе на новых месцах.
Абу-Саід Эльдарушаў: з «МЛ» у расійскі «Ротар»
Фота: афіцыйны сайт «Ротара»
Расійскі форвард прыязджаў у Беларусь летам 2025-га ў арэнду з «Балтыкі». У «МЛ» стаў цвёрдым гульцом старту і за 15 гульняў ЧБ тройчы забіў, а яшчэ аформіў хет-трык у Кубку са «Слонімам» з Д2.
Па вяртанні ў Расію нападнік паехаў у новую арэнду – у «Ротар», які цяпер займае 4-е месца ў мясцовым Д2, прэтэндуючы на выхад у Д1. 24-гадовы Эльдарушаў паказвае сябе вельмі добра: за шэсць матчаў – чатыры галы (больш, чым за круг «вышкі» ў «МЛ») і адзін асіст. Самым прыгожым з мячоў, бадай, выйшаў стрэл у браму «Чарнаморца» (4:1).
Райманд Адэола: з «Гомеля» у турэцкі «Серык»
Фота: акаўнт «Серыка» ў Facebook
Нігерыйскі кліент Дзмітрыя Сялюка ў другім коле мінулага сезона стаў рухавіком «Гомеля» і, набраўшы 5+7 за 15 матчаў ЧБ, вельмі дапамог «рысям» ачуняць.
Па сканчэнні сезона вінгер пераехаў у «Серык» – клуб-сінонім хаоса, дзе ўжо і так хапала экс-гульцоў «вышкі», а яшчэ былі праблемы з фінансаваннем. Пра футбольныя і не вельмі справы там мы расказвалі асобна.
В одной из худших команд турецкого Д2 образовалась колония из Беларуси. Какой же там хаос!
З таго моманту звязаны з камандай расійскі інвестар Туфан Садыгаў атрымаў пажыццёвы бан ад ФІФА на футбольную дзейнасць ва ўсім свеце.
24-гадовы Адэола ў Турцыі правёў ужо 12 матчаў, аформіў адзін мяч і два асісты. Каманда ідзе ў зоне вылету за чатыры туры да фінішу.
Пэдра Ігар: з мінскага «Дынама» ў плоўдзіўскі «Боцеў»
Фота: афіцыйны сайт «Боцева»
Бразільскі вінгер у «Дынама» правёў паўтара сезона і ва ўсіх турнірах сабраў 38 выхадаў на поле з 8+2 па «гол+пас». На «вышку»-2025 прыйшліся толькі 16 гульняў і 3+1. Ігар быў далёкі ад стабільнасці, але ў дрыблінгу і гульні адзін у адзін вылучаўся.
Зімой перабраўся ў балгарскі «Боцеў» з Плоўдзіва. Паводле мясцовых медыя, дынамаўцы атрымалі кампенсацыю ў 100 тысяч еўра.
На новым месцы 24-гадовы футбаліст правёў сем матчаў і аднойчы забіў. Апошнія тры туры чэмпіянату чамусьці знаходзіцца па-за заяўкай. Да канца першай часткі сезона застаўся адзін тур, які вырашыць, ці патрапіць «Боцеў» у пул каманд-прэтэндэнтаў на пуцёўку ў ЛК.
Жунінья: з «МЛ» у сербскі «ІМТ»
Жуньнья – другі злева ўнізе. Фота: інстаграм-акаўнт «ІМТ»
Бразільскі вінгер у «букмекераў» знаходзіўся па арэндным пагадненні з «Карынціянсам». Набраў 4+4 за 29 матчаў вышэйшай лігі-2025.
У 2026-м Жунінью скіравалі ў сербскі «ІМТ», чыя прэс-служба назваў пераход «бомбай». Але Жунінья знаходзіцца ў Сербіі ўжо больш за два месяцы, а правёў толькі чатыры безвыніковыя матчы. Каманда 19-гадовага футбаліста ідзе 9-й пасля 30 тураў, балансуючы паміж верхнім і ніжнім пулам.
Іван Канавалаў: з мінскага «Дынама» ў казахстанскі «Алтай»
Леташняе пытанне кіпераў у «Дынама» адыграла не апошнюю ролю ў хуткім вылету з еўракубкаў. Пасля таго закрываць пазіцыю запрасілі расіяніна. У «вышцы»-2025 Канавалаў правёў 13 матчаў, прапусціў 11 разоў і аформіў пяць «сухароў».
Цяпер 31-гадовы кіпер далучыўся да дэбютанта казахстанскай прэм’ер-лігі «Алтая». Там ненадоўга траўмаваўся, але ўжо паспеў аднавіцца. За чатыры туры згуляў тройчы, ў двух матчах прапусціў па адным мячы, а трэці правёў «на нуль».
Фард Ібрагім: з мінскага «Дынама» ў казахстанскі «Іртыш»
Фота: інстаграм-акаўнт «Іртыша»
Ганскі абаронца ў мінулым сезоне ЧБ адгуляў 21 матч і адзначыўся адным голам. У міжсезонне стаў аднаклубнікам чатырох беларусаў і падапечным Кірыла Альшэўскага. Увогуле разам з Фардам у «Іртышы» цяпер гуляюць сем футбалістаў з досведам у ЧБ.
Сам абаронца правёў два стартавых туры ў старце, але зарабіў чырвоную і быў дыскваліфікаваны.
Алімардон Шукураў: з «Тарпеда-БелАЗ» у кыргызстанскі «Мурас Юнайтэд»
Кыргызстанскі паўабаронца правёў некалькі добрых сезонаў у ЧБ, але летась палову гульняў прапусціў праз траўму. На выхадзе – 1+2 у 16 матчах за «Тарпеда-БелАЗ».
Зімой 26-гадовы Шукураў вярнуўся на Радзіму і падпісаўся з «Мурас Юнайтэд», дзе за 5 тураў атрымаў толькі чатыры хвіліны на полі. Прычына зноў у траўме.
Мамаду Камара: з «Тарпеда-БелАЗ» ў маскоўскае «Тарпеда»
Фота: афіцыйны сайт «Тарпеда» Масква
Форвард у мінулым сезоне згуляў 25 матчаў за жодзінцаў і аформіў 3+1 па «гол+пас». На тым арэнда скончылася, і Камара вярнуўся ў маскоўскае «Тарпеда».
Пад кіраўніцтвам Алега Конанава – расіяніна з беларускім пашпартам – форвард правёў чатары матчы і аднойчы забіў. А яшчэ дэбютаваў за зборную Малі ў спарынгу з Расіяй (0:0). Праўда, на гэтую гульню ў афрыканцаў не даехаў амаль ніхто з лідараў.
Іншыя пасты карыстальніка
