Топ-батуцістка з Беларусі пабралася шлюбам з экс-партнёрам па зборнай – там любяць «унутраныя саюзы»
Праца, якая дапамагае асабістаму шчасцю.
19 ліпеня на адну спартыўную пару ў Беларусі паболела. Кацярына Яршова, якая выступае за зборную па батуце, пабралася шлюбам з 24-гадовым Мікітам Фомчанка – былым чальцом той жа каманды.
Вяселле адбылося менш чым праз два тыдні пасля найбуйнейшага поспеху ў кар'еры нявесты, якая з'яўляецца падпісанткай прарэжымага ліста за дыктатуру (як распавядаў Сцяпан Папоў, не падпісаць ліст у батутнай зборнай было немагчыма). 6 ліпеня яна ўпершыню выйграла этап Кубку свету, хаця да таго нават у тройку прызёраў ніколі не трапляла.
Дзякуючы поспеху 22-гадовая беларуска аказалася на трэцім радку у сусветным рэйтынгу батуцістаў ад Міжнароднай федэрацыі гімнастыкі (FIG) і проста цяпер апярэджвае лідарку зборнай Віялету Бардзілоўскую – срэбная медалістка Алімпіяды-2024 на 5-м радку. Зрэшты, паспяховы для Яршовай этап КС Бардзілоўская прапускала.
Муж Яршовай таксама падпісант прарэжымнага ліста. Хоць Фомчанка цяпер па-за складам батуцістаў, ён мае чым пахваліцца. Мае на рахунку медалі юніёрскіх чэмпіянатаў свету, Еўропы. Браў дарослыя ўзнагароды ў Беларусі. А яшчэ выступаў у пары з цяперашнім лідарам зборнай – яшчэ адным падпісантам за дыктатара Іванам Літвіновічам.
У 2018-м менавіта з Фомчанкам у пары апошні ўпершыню стаў прызёрам ЧБ, а годам пазней у іх была сумесная бронза на этапе КС у Іспаніі. Цяпер жа былы напарнік Літвіновіча чысліцца трэнерам у батутным аддзяленні РЦАП па гімнастычных відах спорту.
Яршова і Фомчанка – не першая пара у батутнай зборнай. Нават сярод дзейных чальцоў ёсць яшчэ адна парачка. Гаворка пра ўжо згаданых медалістку парыжскіх Гульняў Бардзілоўскую і яе бойфрэнда Літвіновіча, двухразовага алімпійскага чэмпіёна (2021, 2024).
Пра рамантычныя стасункі паміж лідарамі зборнай стала вядома ў траўні 2024 года. Тады Бардзілоўская заваявала алімпійскую ліцэнзію – і адсвяткавала поспех пацалункам з Літвіновічам, ну а фота выклала ў Instagram.
Для абодвух тая Алімпіяда склалася паспяхова. Прычым свае медалі Бардзілоўская і Літвіновіч заваявалі ў адзін дзень. Такі вось прыгожы паварот.
Па ўсім відаць, Літвіновіч і Бардзілоўская дагэтуль у стасунках. У снежні 2024-га яны разам выступалі на спартыўна-забаўляльным шоў «Час нашых перамог», якое нібыта прыдумаў асабіста дыктатар Лукашэнка. А ў красавіку бягучага года пара перамагла ў змяшаным заліку на турніры ў Віцебску.
Але не Яршова з Фомчанкам пайшлі ў ЗАГЗ першымі ад батутнай зборнай. На восем гадоў раней тое зрабілі Уладзіслаў Ганчароў і Ганна Гарчанок.
Гэтая пара таксама была зорнай. Ганчароў быў пераможцам чэмпіянатаў свету і Еўропы, а за год да вяселля заваяваў першае беларускае алімпійскае золата ў батутных скачках у Рыа. Гарчанок мела медалі кантынентальных спаборніцтваў.
Хоць жаніхом і нявестай яны былі доўгі час, пра шлюб пары стала вядома выпадкова. У 2018-м Ганчароў перамог на этапе КС у Швейцырыі, там жа другой стала Гарчанок – і заўзятары звярнулі ўвагу, што выступалі яны пад адным прозвішчам. Хутка стала вядома, што спартсмены сапраўды пабраліся шлюбам напрыканцы 2017-га, проста вырашылі не афішыраваць вяселле.
– Усё прайшло ціхенька, у коле сям'і. Амаль нікому пра гэта не расказвалі. Хаця да гэтага шмат хто з карэспандэнтаў пытаўся: калі ж вяселле? А калі гэта адбылося, ва ўсіх адпала цікавасць да гэтай падзеі. Але мы не хацелі вяселля ў звычайным яго разуменні, хацелі для яго сябе, каб было проста сямейнае свята. Як хацелі – так і зрабілі. І вельмі задаволеныя, – распавядаў Ганчароў.
Праз два гады жонка сыйшла са спорту – спачатку атрымала цяжкую траўму, а потым нарадзіла адразу двух дзяўчынак. Муж у 2020-м падпісаўся за дыктатуру і працягнуў скакаць. На Алімпіядзе-2020 меў шанц ізноў заваяваць медаль, але праляцеў міма бронзы праз трыюмф Літвіновіча.
Хутка са спорту сышоў і Ганчароў. У 2023-м стала вядома, што незадволены статусам другога нумара ў зборнай і стаміўшыся ад міжнароднага бану батуціст пераехаў у ЗША, дзе пачаў працаваць са знакамітым Cirque du Soleil.
Мяркуючы па фота ў Instagram экс-спартсмена, сям'я па-ранейшаму жыве за акіянам. За апошні год там можна знайсці публікацыі з Арызоня, Лас-Вегаса, Мексікі ды іншых месцаў.
Іншыя пасты карыстальніка
