Мароз у адносінах Коласава з «Філадэльфіяй» – ад адкрытага дэмаршу да знакавага дэбюта для беларускага хакея

З аднаго боку Аляксей Коласаў назаўсёды трапіў у гісторыю нашага хакея. У красавіку 2021-га ён першым сярод беларускіх брамнікаў быў абраны на драфце НХЛ. А напачатку бягучай нядзелі аформіў дэбют у наймацнейшай лізе свету, чаго з прадстаўнікамі беларускай варатарскай школы таксама раней не здаралася.

Чаму першы беларускі брамнік у НХЛ – не Мезін? Занадта шмат хацеў, гарантыі Хэнлана не пераконвалі

Выключнасць падзеі абмеркаванню не падлягае. Віншаванні Коласаву ад старшыні ФХБ Аляксандра Багдановіча і сенатара (не, не Рымскай Імперыі) Дзмітрыя Баскава заслужаныя цалкам. Хіба толькі далучацца да гэтай кампаніі няма жадання. А вось сказаць дзякуй клубу, які зрабіў гэта ўсё магчымым, ёсць. Той самы другі бок – «Філадэльфія».

Пасля першай гульні ў НХЛ Коласаў нічога не сказаў франшызе. Нават дзяжурных фраз пра радасць ад дэбюту няма. Больш за тое, ад моманту драфта Аляксея ў яго афіцыйным акаўнце Instagram аніводнага ўспаміну пра «Флаерз» – ў апісанні профілю ён гулец мінскага «Дынама», у самой стужцы фотаздымкі ў форме «зуброў» і зборнай.

Мабыць беларускі хакеіст проста не губляе час на Instagram? Усё ж такі апошняя публікацыя была зроблена ў 2023-м. Тады можна паразмаўляць пра тое, у якім кантэксце адбыўся знакавы матч Коласава.

У 2023-м хакеіст падпісаў з «Філадэльфіяй» кантракт пачаткоўца на тры гады, пасля чаго накіраваўся ў мінскае «Дынама» на правах арэнды. Калі сезон-2023/24 для «зуброў» скончыўся, Коласаў вярнуўся ў Штаты, дзе яго далучылі да фарма «Ліхай Вэлі». Згуляўшы два матча ў рэгулярцы АХЛ і прапусціўшы 1/8 плэй-оф Кубка Колдэра, нешта беларуса стала незадавальняць.

У траўні з'явіліся чуткі (як высветліцца пазней, не беспадстаўныя) пра праблемы з адаптацыяй у Паўночнай Амерыцы і магчымае вяртанне ў мінскае «Дынама». Суайчыннік Уладзіслаў Кадола таксама распавёў, што гуляць у АХЛ у Коласава няма ахвоты.

Уладзіслаў Кадола: «Коласаў сказаў, што ўзровень гульні ў КХЛ вышэйшы, чым у АХЛ. Не ведаю, будзе ён там заставацца ці вернецца, у яго ёсць сумневы»

Праз скончаны тэрмін дзеяння візы Коласаў прапусціў ліпеньскі трэніровачны кэмп «Філадэльфіі». Ці толькі праз гэта? Пазней журналіст «СЭ» Іваг Богун падзяліўся вельмі цікавымі дэталямі.

– Чуў, што галкіпер ужо папрасіў кіраўніцтва мінскага «Дынама» зрабіць усё, каб тыя дапамаглі развязаць яму пытанне з скасаваннем кантракту ў НХЛ.

Смяшней за ўсё, што ён павінен быў паляцець у Пенсільванію яшчэ 20 чэрвеня па набытых «лётчыкамі» квітках, але «цалкам выпадкова» праспаў рэйс і застаўся ў Беларусі, – пісаў Богун.

Хутка дэмарш стаў адкрытым. Коласаў перастаў выходзіць на сувязь з прадстаўнікамі «Філадэльфіі», пра што распавёў гендыр франшызы Даніэль Брыер, абмовіўшыся, што хакеіст не ведае англійскай мовы. Пра апошняе выказаўся і галоўны трэнер фарма «Флаерз»:

– Яму прыйшлося нялёгка, але хлопцы клікалі яго кожны дзень хадзіць на вячэру, а ён адмаўляўся. Я разумею, ён не гаворыць па-англiйску, так што гэта павінна быць цяжка. <..> Гэта частка прафесійнага хакея, калі ты пераязджаеш з адной краіны ў іншую, табе даводзіцца вучыць мову, – казаў Ян Лапер'ер.

Прапусціў беларускі брамнік і кэмп у верасні, трэніруючыся ўвесь гэты час дзе б вы думалі? Так, у мінскім «Дынама». Цалкам забіўшы на кантракт з «Філадэльфіяй».

Што ў выніку прымусіла Коласава вярнуцца на нялюбае месца, ведае толькі хакеіст, яго новы агент Дэн Мільштэйн і кіраўніцтва «Флаерз». Няхай прадстаўнік гульца і заявіў напрыканцы верасня, што рознагалоссяў паміж яго кліентам і клубам няма, пагадзіцеся, веры гэтаму няма.

Ці атрымаецца нешта добрае паміж «Філадэльфіяй» і Коласавым цяжка сказаць і пасля першага матча брамніка за клуб. Параза 3:4 ад «Манрэаля», згуляў беларус і не тое каб дрэнна, але ж і не добра. Толькі Трэвіс Санхайм, дэф «Філадэльфіі», сказаў пасля гульні: «Абаронцы размаўляюць, і відаць, што ён [Коласаў] не да канца разумее, што мы гаворым, і ў выніку нам закідваюць пару шайб. Гэта тое, над чым мы павінны працягваць працаваць».

Адпрацоўваць камунікацыю з брамнікам, што не вывучыў англійскую больш чым за тры гады, вырашылі па-за межамі лядовай пляцоўкі. У сённяшнім матчы супраць «Бостана» беларус быў запасным, у той час як Самуэль Эрсан аформіў першы шатаўт у сезоне – перамога «Флаерз» 2:0.

Відавочна, наперадзе у Коласава шмат працы, канкурэнцыю яшчэ трэба выйграваць у расіяніна Івана Федотава. Ці ёсць на гэта матывацыя ў гульца, які так паслядоўна рабіў усё, каб апынуцца замест НХЛ у мінскім «Дынама» – пытанне другое. Ці ёсць сэнс «Філадэльфіі» даваць шанцы хакеісту, які відавочна не паважае клуб – пытанне трэцяе.

Але за знакавы дэбют «Флайерз» дзякуй.