Хакеісты ламалі насы, кідалі ў сваіх і заўзятараў – такі вось апасны ўікэнд у беларускай экстралізе
Беларускі хакей траўмуе (і пацешыць).
На мінулых выходных беларуская экстраліга праславілася сваёй траўманебяспечнасцю. Прычым пацярпелі не толькі хакеісты, але і заўзятары.
Так, яшчэ ўвечары пятніцы 29 лістапада, напрыканцы матчу «Юнацтва» з «Віцебскам» (1:4) шайба прыляцела ў галаву дзяўчыне на трыбунах. Галоўны суддзя сустрэчы Пётр Амосаў аператыўна зрэагаваў на эпізод і паклікаў брыгаду хуткай дапамогі.
Пра далейшы стан пацярпелай не паведамлялася, а пасля гульні галоўны трэнер «Юнацтва» Сяргей Стась пажадаў ёй здароўя.
Быў на тым матчы і такі заўзятар, які спрабаваў пацягацца ў танцах з чырлідаршай мінчукоў. Чым для яго гэта скончылася пасля з’яўлення ў кадры сілавікоў – невядома.
У нядзелю шайбай у твар зарадзілі ўжо 22-гадоваму хакеісту «Нёмана» Захару Малашкевічу, прычым зрабіў тое сукаманднік.
Як паведаміла прэс-служба клуба пасля гульні з «Хімікам» (3:1), сур’ёзных пашкоджанняў гулец не атрымаў.
Ну і галоўны хайлайт уікенда: бойка ў Брэсце, дзе абаронца хатняй каманды Раман Пятручык адным ударам адправіў у накдаўн форварда «Металурга» Іллю Шурынава. Той рухнуў на лёд і не змог працягнуць матч.
Пра Пятручыка зазначым, што ён не ў першы раз перамагае суперніка на кулаках. У Шурынава жа падазраюць пералом носа, але наўрад ці яго камандзе гэта сапсавала настрой – мінімальная перамога 1:0 для «Металурга», што наблізіла яго да тройкі лідараў.
Вось як выглядае табліца цяпер.
Калі вы не ў Беларусі, падпісвайцеся на Telegram-канал «Трыбуны», каб не прапускаць важныя падзеі і пацешныя моманты з беларускага спорту.
Іншыя пасты карыстальніка
