Гэтыя зоркі беларускага спорту ўжо дакладна праляцелі міма Алімпіяды-2026. Ну хіба што здарыцца нейкі цуд
І за кім цяпер сачыць?
У лютым 2026-га (то бок засталося ўсяго чатыры месяцы) у Мілане і Карціне адбудзецца зімняя Алімпіяда. Ужо вядома, што новая глава Міжнароднага алімпійскага камітэту Крысці Ковентры працягнула правілы і абмежаванні, якія былі прынятыя яшчэ пры Томасе Баху і дзейнічалі мінулым летам падчас Гульняў у Парыжы.
Тады ў Францыю паехалі толькі 17 нейтральных беларусаў – цяпер прэзідэнт НАК Украіны Вадзім Гутцайт прагназуе прыблізнае такую ж колькасць атлетаў.
Важна, што МАК толькі рэкамендуе, а вось спартыўныя федэрацыі самастойна прымаюць рашэнне наконт допуску нейтральных атлетаў з Беларусі і Расіі ў сваіх відах спорту.
Днямі стала вядома, што першай на Алімпіяду-2026 ад Беларусі адабралася натуралізаваная расіянка з фігурнага катання – там ніхто не супраць нейтральных атлетаў, але трэба яшчэ прайсці адмысловую камісію.
Але ёсць і беларусы, якія ўжо дакладна не выправяцца ў Мілан праз больш жорскае стаўленне сваіх міжнародных федэрацый. Гэтым людзям дапамагчы можа толькі цуд, але яго на гарызонце няма і блізка.
Пара Смольскіх і Сола не трапляюць пад рэгламент IBU
Пазіцыя Міжнароднага саюза біятланістаў даўняя і паслядоўная: ад самага пачатку паўнамаштабнай нападу Расіі пры падтрымцы рэжыму Аляксандра Лукашэнкі на Украіну IBU прыпыніў сяброўства федэрацый краін-агрэсараў і перастаў дапускаць беларусаў і расіян да стартаў.
Калі МАК нейтральные спартсмены задавальняюць, то ў біятлоне іх не можа быць па рэгламенце, таму галоўная беларуская пара ў гэтым відзе спорту італьянскую Алімпіяду прапусціць.
«Цяпер мае думкі выключна пра Алімпійскія гульні. І я разумею, што без добрага фізічнага складніка, дакладнай стральбы, сэнсу туды ехаць няма», – казаў 28-гадовы лідар мужчынскай зборнай Антон Смольскі 11 верасня.
Не мінула і двух тыдняў, а ўжо відавочна, што пра Алімпіяду можна больш не думаць. Але ў спартсмена свой сусвет. Ён кажа, што «ідзе інфармацыйная вайна», а ўсе навіны, якія ён чытае, «не ўспрымае сур’ёзна». То бок нядопуск нейтралаў у біятлоне Смольскі наўрад ці лічыць выракам.
Але ж прэс-рэлізы IBU калі і пакідаюць спадзеў, то толькі на нейкі цуд, які мусіць здарыцца ў апошні момант.
29-гадовая жонка біятланіста Дзінара Смольская, як і муж, днямі выйграла спрынт на летнім чэмпіянаце Беларусі. Яшчэ ў ліпені гэтага году спартсменка казала, што «ўсё [ў трэнавальным працэсе] выбудавана пад Алімпіяду», але «ёсць план А і план Б».
– Няма такога, што альбо Алімпіяда, альбо завяршаю карʼеру. Калі не трапім на Алімпійскія гульні, канешне, будзем сачыць, – сказала ў верасні сталая ўдзельніца прапагандысцкіх мерапрыемстваў.
Калі фізічна біятлонная зборная планавала быць на піку пад Алімпіяду (і ў кастрычніку паедзе на зборы ў Арменію), то з тэхнічным аспектам заўсёды былі праблемы. Па стане на красавік 2025-га ў зборнай было мала добрых лыжаў, а ў верасні Смольская прызналася, што «часам яны страляюць на трэнінгах вельмі дрэннымі патронамі, якія не заўсёды нават далятаюць да ўстаноўкі».
Зрэшты, у Італіі ў гэтым годзе Смольскія ўжо былі і тады наведвалі алімпійскія аб’екты, але іх надзеі патрапіць туды яшчэ раз на сам турнір ўсё ж не ажыццявіліся.
Яшчэ адна зорка беларускай біятлоннай каманды – Ганна Сола – асабліва не выказваецца на алімпійскую тэму і ўвогуле прысутнічае ў медыя куды менш. Але маўчанне не набліжае яе да Італіі.
Беларусы НХЛ страцілі першы за 12 гадоў шанец патрапіць на АГ
Адбор на Алімпійскія гульні-2026 у хакеі адбыўся яшчэ ў 2024 годзе. Беларусь да кваліфікацыі не дапусцілі, а ў рэйтынгу зборных каманда не знаходзіцца так высока, каб патрапіць на Алімпіяду наўпрост. Зрэшты, гэты варыянт таксама пазней бы адпаў (як і ў кейсе з Расіяй).
Ва ўмовах адхілення ад міжнародных турніраў праверыць, ці мелі беларусы рэальны шанц патрапіць на Алімпіяду, канешне, немагчыма. Таму застаецца канстатаваць, што ў асноўны турнір праз кваліфікацыю прабіліся славакі, латвійцы і датчане, а фінальны склад груп выглядае так.
Калі Беларусі трэба было праходзіць кваліфікацыю, то Расія магла патрапіць у Мілан аўтаматычна праз 2-е месца ў сусветным рэйтынгу, але яе замянілі Францыяй.
Увогуле, беларускія хакеісты апошні раз прабіваліся на Алімпіяду ажно 15 гадоў таму – у 2010-м. Тады ў Ванкуверы было заваяванае 9-е месца.
Алімпійскія гульні-2026 адметныя тым, што на іх пасля перапынку ў 12 гадоў прыедуць гульцы з НХЛ. Калі б зборная Беларусі ўсё ж прарвалася б на турнір, то магла б разлічваць на дапамогу Аляксея Протаса і Ягора Шаранговіча. Галоўныя беларускія топы НХЛ рэгулярна агучваюць жаданне гуляць за зборную.
Форвард «Вашынгтона» казаў, што «будзе гуляць і спадзявацца, што хутка шанц [выступіць за Беларусь] будзе прадстаўлены», а нападнік «Калгары» адзначыў, што «было б выдатна» паўдзельнічаць у міжнародным турніры. Што ж, пакуль гэта будзе не Алімпіяда.
Некаторыя канькабежцы допуск атрымалі, а вось лідары зборнай – не
Міжнародны саюз канькабежцаў сваё рашэнне па допуску і недопуску беларусаў вынес яшчэ ў сярэдзіне траўня, прычым адразу заявіў, што яго нельга абскардзіць. Мы ўжо расказвалі пра тое, каго ISU палічыў досыць нейтральным і даў магчымасць адбірацца на Гульні. Там ёсць нават падпісанты за рэжым.
Пры гэтым у спісе не аказалася лідараў беларускай зборнай Ігната Галавацюка і Ганны Дамарацкай – яны былі сцяганошамі падчас Алімпіяды-2022.
Кіраўніца Беларускага саюза канькабежцаў Юлія Комлева сказала, што за гэтых дваіх «змагаюцца» і ўжо знаходзяцца ў афіцыйнай перапісцы, праўда, не ўдакладніла з кім і ўвогуле да гэтай тэмы больш не вярталася.
А не дапусцілі Дамарацкую і Галавацюка не проста так: першая неаднаразова хадзіла на дыктарскія балі, а другі не толькі рабіў, але і шмат гаварыў. Біятланістам Смольскім з гэтай нагоды таксама варта было б напружыцца, але ў IBU апярэдзілі камісію.
Пры гэтым Галавацюк, магчыма, і не меў асаблівага імпэту да Алімпіяды. Прынамсі, ён заклікаў падумаць, ці трэба туды ехаць пры ўмовах, «калі абмежаванні абыдуць не ўсе».
Фота: тэлеграм-канал Смольскіх; belta.by; інстаграм-акаўнты Шаранговіча і Протаса; НХЛ.
Іншыя пасты карыстальніка
