Жонка хакеіста, замяшанага ў дамоўным матчы, ужо два гады змагаецца з ракам
Пост са зборам сродкаў падтрымаў адзін з галоўных блізнюкоў белхакея
Амаль два гады таму ў жонкі хакеіста Сяргея Шэлега выявілі рак. Увесь гэты час яна лячылася ў Брэсцкім і Мінскім анкалагічных цэнтрах, але станоўчага выніку не было. Цяпер патрабуецца тэрапія за мяжой, але сям’я не мае ўсёй патрэбнай сумы. У сужэнцаў трое дзяцей, малодшаму – усяго два гады.
Сяргей Шэлег вядомы не толькі як трохразовы чэмпіён Беларусі ў складзе «Юнацтва», але і як фігурант скандальнага дагаворнага матчу «Дынама-Маладзечна» – «Магілёў» у 2019 годзе. Маладзечанцы вялі 5:1, але прайгралі 5:6. Расследаванне скончылася сур’ёзнымі наступствамі для гульцоў.
Суд прыгаварыў Шэлега да двух гадоў пазбаўлення волі з выпрабавальным тэрмінам два гады і адтэрміноўкай прысуду. Акрамя таго, хакеіст быў аштрафаваны на 100 базавых велічынь (каля 2700 беларускіх рублёў) і атрымаў год дыскваліфікацыі.
Цяпер, у 35 гадоў, Шэлег выступае за «Ліду» з Экстралігі (12-е месца ў сезоне-2024/25) і з’яўляецца капітанам каманды. Раней ён доўга гуляў за «Брэст», а таксама мінскае «Дынама» ў КХЛ.
Пост пра збор сродкаў сабраў амаль 100 каментарыяў. Сярод тых, хто падтрымаў – Сяргей Маляўка, адзін з галоўных блізнят беларускага хакея, якія нядаўна скончылі кар’еру.
Іншыя пасты карыстальніка
