Яшчэ адзін «Белаз» у белспорце: замест адпраўкі па бульбу знёс адэпта «рускага свету», але і сам выглядае такім жа
Мае фота і з будучым кіраўніком АБФФ, і з сусветнай зоркай баёў.
Завод БелАЗ вядомы ў белспорце: гэта партнёр федэрацый бокса і плавання, даўні спонсар пляжнага футбола, меў сваю велакаманду, жаночая гандбольная каманда БНТУ-БелАЗ – дзейны чэмпіён. Ну і, вядома, ёсць футбольны «Тарпеда-БелАЗ», дзе нядаўна якраз разважалі пра гонар брэнда.
Але ёсць у белспорце і «Белаз», аб якім вы маглі не чуць. Пад такім псеўданімам вядомы 26-гадовы Уладзіслаў Кавалёў, які за апошні год набраў вядомасці ў расійскім MMA – а цяпер атрымаў рэйтынгавую перамогу і прагне выйсці на сусветны ўзровень. Праўда, некаторыя факты біяграфіі байца моцна перашкаджаюць яму сімпатызаваць. Давайце паглядзім на Кавалёва падрабязней.
Кавалёў рос у невялікай вёсцы Чорны Бор пад Магілёвам. У адным з інтэрв’ю спартсмен распавядаў, што дзяцінства ў яго было бедным, часам дома не было нават хлеба, таму даводзілася падпрацоўваць: пасвіў кароў, збіраў ягады, грыбы, метал – гэтак будучы спартсмен намагаўся дапамагчы маці, бо грошай не хапала, а бацькі не было. А яшчэ ён часцяком біўся ў школе, таму аднойчы, каб тое не было «за гаражамі», яго прывёў у зал трэнер. Гэтак пачаўся шлях Кавалёва ў адзінаборствах.
Спачатку ён займаўся вольнай барацьбой, дзе ў выніку атрымаў званне майстра спорту. Але быў расчараваны адсутнасцю грошай – і ездзіў зарабляць у Польшчу, збіраў мэблю на фабрыцы.
– У мяне проста не было грошай на жыццё. Хаця быццам спартсмен сур’ёзнага ўзроўню, у зборнай Беларусі. Увогуле, калі мне дапамаглі паехаць у Польшчу, я нават не разважаў. Працаваў па 12 гадзін амаль кожны дзень, былі перыяды – па 16. Потым знайшоў залу, нават дзесьці менш працаваў, затое паднімаў узровень у змешаных адзінаборствах, – казаў Кавалёў.
У 2019 годзе хлопец думаў зноў ехаць у Польшчу зарабляць на заводзе, але пасля выйгранага аматарскага чэмпіянату краіны па змешаных адзінаборстваў захацеў яшчэ паспрабаваць у спорце. Для гэтага рушыў у Маскву, дзе змог падпісацца з прамоўшанам «Наше дело» і пачаў выступаць у так званым «поп-ММА» – з удзелам вядомых у сацсетках людзей па-за залежнасцю ад досведу і падрыхтоўкі, з вялікай важнасцю медыйнай раскруткі. Мянушкі там – звычайная справа для гучнасці. Чаму менавiта «Белаз» – тлумачэння ад байца мы не знайшлі, але брэнд жа.
Самым адметным супрацьстаяннем у той час стаў бой супраць Шарабудзіна Магамедава – цяперашні баец UFC атрымаў перамогу толькі рашэннем суддзяў.
Грошай ад «Нашего дела» Кавалёву жыццё ў Маскве не хапала. Калі кіраўніцтва адмовілася падвышаць ганарар, баец сышоў са статыстыкай 2-2 і, паводле яго слоў, з менш чым 100 доларамi ў кiшэнi.
Пазней Кавалёў аказаўся ў Hardcore FC – прамоўшне кулачных баёў. I ў 2021-м удала «хайпануў» на прысутнасцi рэпера Morgenshtern, у якога быў пiк папулярнасцi ў Расii. Кавалёў вызваў артыста на бой, казаў, што гатовы падрацца з любым яго ахоўнікам. Канешне, зрабіць нiчога не далі, але піяр атрымаўся выдатны.
Першай сенсацыяй у кар’еры Кавалёва стаў чэмпіёнскі пояс Hardcore у 2023 годзе, які быў атрыманы перамогай над фаварытам Мухамедам Калмыкавым. Але ў хуткім часе Кавалёў сышоў з прамоўшна – ізноў не падзялілі грошы. Hardcore запатрабаваў вярнуць пояс, Кавалёў адмовіўся – тады прамоўшн звярнуўся ў лукашэнкаўскi «суд», які наклаў арышт на машыну байца, пакуль ён не верне чужую маёмасць. Толькi тады Кавалёў усё ж аддаў трафей.
Канешне, больш на Hardcore Кавалёў не біўся. Затое ў лістападзе 2023-га падпісаў кантракт з лігай Ural Fighting Championship і вярнуўся ў ММА. У 2024-м Кавалёў быў прызнаны найлепшым байцом Ural FC дзякуючы тром запар перамогам у чатырох баях – адзіны прайграны быў прызнаны нелегiтымным праз памылку суддзяў.
Адзiн з тых паядынкаў па правiлах ММА, але толькi ў стойке, Кавалёў выйграў у расiянiна Валерыя Мяснікова. У сакавіку 2025-га iм зладзiлi рэванш – ўжо кулачны бой у рамках аднаго з вядучых прамоўшанаў Расii Russian Cagefighting Championship (RCC). Кавалёў зноў выйграў, дзякуючы чаму атрымаў кантракт на турнiр RCC па ММА на бой з вядомым у сферы 41-гадовым расiянiнам Аляксандрам Шляменкам.
Было незразумела толькi, для чаго гэта апошняму. Расіянін меў за плячыма больш за 80 паядынкаў у MMA (66 перамог, 15 параз і 1 нічыя) і пояс чэмпіёна сусветна вядомага прамоўшна Bellator у сярэдняй вазе ў 2013-2014 гадах. У Кавалёва – толькі 8 (6-2) ММА-баёў, iнакш кажучы, не вялiкае iмя. Пры гэтым з улiкам узроста i формы фаварытам Шляменка не выглядаў – перад боем пiсалi, што ён спакойна можа i прайграць ноўнэйму, а перамога фактычна нiчога не прынясе. Ды нават сам расiянiн казаў, што бой яму невыгодны.
I нават iдэалагiчна супернiкам не было чаго дзялiць – яны абодва выглядаюць сталымi адэптамi «рускага свету». Шляменка вядомы як актыўны прыхільнік расійскай вайны ва Украіне і нядаўна хваліўся медалём за садзейства дзеянням акупацыйнай арміі. Кавалёў жа з’яўляецца саўладальнікам і трэнерам маскоўскага байцоўскага клубу «Аляксандр Неўскі». На сайце пазначана, што яго мэта – «адраджэнне рускага воінскага духу, напамін пра вялікіх герояў і традыцыі» Расіі, у адным з допісаў (да якога прыклалі фота з трэнінга са зброяй на палігоне) прызнаюцца, што «даўно выйшлі за межы спорту». «Неўскім» разам з Кавалёвым валодае Аляксандр Салдаценкаў, які апісваецца як «ветэран баявых дзеянняў». З фотаздымкаў на яго старонцы можна меркаваць, што Салдаценкаў браў удзел менавiта ў расійскай агрэсіі супраць Украіны.
Ідэалы клубу прасоўвае і сам Кавалёў, хіба што не быў заўважаны са зброяй у руках. На старонках беларускага байца хапае кантэнту пра Русь (напрыклад, відэа, дзе ён распавядае пра баі на кулаках як забаву «нашых продкаў на Русі»). На баі Кавалёў выходзіў не толькi з чырвона-зялёным сцягам, але i з сімволікай «Неўскага», а неяк – пад песню «Матушка зямля», якую выкарыстоўвае прапаганда i выконваюць на праваенных канцэртах.
Пра пазіцыю спартсмена наконт сітуацыі ў Беларусі можна меркаваць з публікацыі напрыканцы 2024 года, дзе Кавалёў звышкампліментарна выказваецца пра двух чынуш Лукашэнкi – кiраўнiка ўпраўлення «мiнспорту» па Мiнскай вобласцi Яўгена Булойчыка, які неўзабаве стане кіраўніком АБФФ, і кiраўнiка выканкама Лукашэнкi па Любаньскiм раёне Вiталя Платуна.
– Гэтыя людзі ведаюць цану працы і свайго народа, і іх навучанні гучаць як музыка для вушэй – яны матывуюць мяне рухацца наперад і ніколі не спыняцца, – напісаў Кавалёў.
Яўген Булойчык і Уладзіслаў Кавалёў
Але, як бы нi былi iдэйна блiзкiя Кавалёў ды Шляменка, а iх бой выставілі галоўнай падзеяй 31 траўня на турніры RCC у Екацярынбургу. I Шляменка рыхтаваўся да супрацьстаяння з Кавалёвым як след – у тым ліку трэштокам, слоўнымi «наездамi», якiя прынята выдаваць перад баямi.
Спачатку Шляменка апублікаваў відэа, у якім прапанаваў Кавалёву «пайсці капаць бульбу» (гумар з банальнага ператвараецца ў вострасацыяльны на фоне дэфіцыт гародніны ў нашай краіне). А потым выдаў: «Калі Белаз хоча нюхаць мае трусы, хай нюхае», – тое была адсылка на любоў Кавалёва з мінулым у барацьбе да партэру.
Сам бой скончыўся так, як асцерагалiся прагназiсты – перамогай Кавалёва па выніку трох раўндаў раздзельным рашэннем суддзяў (29-28, 29-28, 28-29). Паводле хайлайтаў бойкі, пераможца даволі ўпэўнена вёў паядынак.
Цяпер Кавалёў займае першы радок у рэйтынгу RCC, але спыняцца на гэтым не збіраецца. Баец ужо не першы год кажа, што будзе ў самым моцным прамоўшне свету UFC, «няхай усе смяюцца» над яго словамi. I пасля самай вялiкай перамогi ў кар’еры Кавалёў зноў завёў гутарку пра гэта, успомнiўшы, што 21 чэрвеня у арганiзацыi турнір у Азербайджане.
– Прыеду са сцягам у Баку, прабяруся на прэс-канферэнцыю, скажу, што ў UFC няма байца з Беларусі – і вось я. Хачу прадстаўляць сваю рэспубліку і буду там другім чэмпіёнам з Беларусі (пасля Андрэя Арлоўскага – Tribuna.com). А я буду, успомніце мае словы, – заявіў Кавалёў.
Што сказаць, паверыць у з’яўленне Кавалёва ў UFC дагэтуль вельмi складана. Затое на яго Instagram цяпер падпісаныя 215 тысяч чалавек, а некаторыя відэа збіраюць i мільённыя прагляды.
Пакуль што Кавалёва з UFC звязвае дзве рэчы: згаданая раней параза ад Магамедава і красавіцкі фотаздымак у Дубаі з экс-зоркай арганізацыі – Конарам МакГрэгарам. Так, справа ірландзец, проста не ў найлепшай форме.
Іншыя пасты карыстальніка
