Выкінуў палкі за агароджу і сышоў з трасы сумна ляжаць – сапраўдная драма ў фінале мужчынскага слалама

Пасля першай спробы ў мужчынскім лыжным слаламе на Алімпіядзе з вялікай перавагай лідараваў нарвежац з амерыканскімі каранямі Атле Ліе Макграт. Яго вынік ніхто не змог пераўзысці ў другім заездзе, а сам спартсмен стартаваў апошнім, ужо ведаючы час супернікаў. Медаль фактычна была ў яго ў кішэні, прычым вельмі блізка да золата. Трэба было толькі чыста прайсці трасу. Тым больш што ўмовы ў другой спробе былі прыкметна прасцейшыя: раніцай – снег і туман, пасля абеду – сонца.

Аднак на адных з варот у Атле ўзніклі праблемы – ён зразумеў, што шанец на медаль страчаны, бо дапусціў памылку пры праходжанні. Тады ён проста шпурнуў свае палкі за межы трасы. На шчасце, ніхто з прысутных не пацярпеў. Пасля гэтага нарвежац пакінуў трасу і пайшоў у бок лесу. Некаторы час ён ляжаў у снезе, закрываючы твар рукамі.

У сацсетках ўжо жартуюць, што гэта нібы ілюстрацыя папулярнага трэнду пра нігілістычнага пінгвіна.

ВІДЭА

За гэтай эмацыйнай рэакцыяй стаіць і асабістая драма. Перад пачаткам Гульняў у Атле памёр дзядуля, што стала для яго цяжкім маральным ударам. У сваіх сацсетках ён запісаў кранальнае відэа і сказаў, што будзе змагацца дзеля яго:

«Гэта, напэўна, самыя цяжкія дні ў маім жыцці. Я вельмі сумую па дзядулю. Менавіта ён прывёў мяне ў гэты спорт і менавіта ён – прычына, па якой я выходжу на старт. Ён хацеў бы, каб усё было менавіта так. Я аддам усе сілы – дзеля яго і дзеля Нарвегіі», – казаў лыжнік.

На старт ён выходзіў з жалобнай павязкай. Макграт выступаў у дзвюх камандных дысцыплінах, дзе Нарвегія заняла 12-е месца. Таксама ён спаборнічаў у гіганцкім слаламе і фінішаваў пятым. Слалам лічыцца яго наймацнейшай дысцыплінай: на чэмпіянаце свету 2025 года ён заваяваў срэбра і разлічваў як мінімум паўтарыць гэты вынік на Алімпіядзе, але дапусціў памылку на варотах.

Увогуле спаборніцтвы атрымаліся надзвычай складанымі для ўсіх удзельнікаў: з 96 лыжнікаў 49 не фінішавалі, двух дыскваліфікавалі, яшчэ адзін не стартаваў. Сярод тых, хто не фінішаваў, быў і адзін з перадстартавых фаварытаў – бразілец Лукас Бротэн. Ён быў найхутчэйшым на першых двух сектарах, але сышоў у трэцім.

Перамогу атрымаў дзейны чэмпіён свету, швейцарац Лоік Меяр. Ён стаў першым швейцарскім алімпійскім чэмпіёнам у мужчынскім слаламе з 1948 года. Па суме двух заездаў Меяр паказаў час 1 хвіліна 53,61 секунды. Меяр на 0,35 секунды апярэдзіў аўстрыйца Фабіа Гштрайна, бронзу заваяваў нарвежац Хенрык Крыстаферсэн.