«Рок-зорка» гэтай Паралімпіяды – амерыканскі лыжнік Патрык Халгрен

Патрыку Халгрену 33 гады. Гэта яго другія Гульні. На Паралімпіядзе ў Італіі ён ужо ўзяў першую медаль – срэбра ў гіганцкім слаламе. Пасля ён сказаў:

«Гэта найлепшы дзень у маім жыцці. Па меншай меры, да заўтра. Гэта проста яшчэ адзін панядзелак, разумееце? Перамогі трэба святкаваць гэтак жа, як і паражэнні. Мне пашчасціла за апошнія 11 гадоў загартаваць свой характар. Страціўшы нагу, я мог альбо здацца і памерці, альбо стаць вялізным Патрыкам Халгренам на Зямлі – і менавіта гэта вы цяпер і бачыце!»

Патрыка называюць «рок-зоркай» гэтых Гульняў. Ён дае правакацыйныя інтэрв’ю, зажыгае на подыуме, не баіцца быць смешным і іграе на мыліцы як на бас-гітары. Напрыклад, амерыканец упаў падчас заезду ў хуткасным спуску, але падняўся і тэатральна спытаў пасля фінішу: «Я перамог?»

На гэтых Гульнях Халгрен выступіць яшчэ ў трох дысцыплінах – супергіганце, слаламе і гарналыжнай камбінацыі.

У 2013 годзе Патрык трапіў у аварыю на матацыкле. Ён на месяц упаў у кому, а прыйшоўшы ў сябе, даведаўся, што лекары ампутуюць яму левую нагу вышэй калена. У гэты момант важнейшым чалавекам у ягоным жыцці стаў брат-блізнятка Лукас. Менавіта ён падштурхнуў Патрыка паспрабаваць сябе ў паралімпійскім гарналыжным спорце. Але ў 2016 годзе Лукас загінуў – таксама ў аварыі на матацыкле. З таго часу Халгрен прысвячае ўсе свае спаборніцтвы брату.