Асанаў не заўважыў венесуэльца і здабыў 13-ю перамогу ў «профі» – насуперак прагнозам, бой скончыўся датэрмінова
«Аса» джаліла «дзіця» без літасці.
У ноч з 4 на 5 чэрвеня па беларускім часе ў Манрэалі адбыўся вялікі вечар бокса. На «разагрэве» перад галоўным боем Рамірэс-Рычардсан баксаваў нараджэнец Маладзечна Дзмітрый The Wasp (Аса) Асанаў, якому супрацьстаяў экс-чэмпіён свету WBA (у 2021-2022) венесуэлец Роджэр The Kid (Дзіця) Гуцьерэс (у лёгкай вазе, да 61,2 кг). Мы расказвалі пра гэтую пару падрабязней.
Букмекеры прагназавалі перамогу Асанава. Фармат паядынку прадугледжваў 10 раўндаў па тры хвіліны. Аднак беларус аказаўся на галаву мацнейшым і завяршыў бой ужо ў шостым раўндзе.
Асанаў магутна трапіў у корпус больш дасведчанага венесуэльца. Гуцьерэс апусціўся на адно калена, але пасля адліку здолеў працягнуць. Неўзабаве на яго абрынулася цэлая серыя дакладных удараў беларуса. Венесуэлец зноў аказаўся на падлозе і ўжо не змог ачуняць. Пасля абавязковага адліку суддзі Асанаў пачаў святкаваць перамогу.
Гэта ўжо 13-я запар перемога 30-гадовага прызёра чэмпіянату свету-2015 у прафесіянальным боксе. Хаця была і адна параза ў Расіі ў 2024-м, якую часцей за ўсё у статыстыку не ўключаюць. Пераможца атрымаў мноства віншаванняў. У тым ліку ад самага папулярнага ў сацсетках прадстаўніка белспорта – кікбаксёра Чынгіза Алазава.
Сам Асанаў у інстаграм падзякаваў Богу. Што да галоўнага бою вечара, то часовы чэмпіён WBA у паўцяжкай вазе (да 79,4 кг) венесуэлец Альберт Рамірэс перамог брытанца Лероўна Рычардса рашэннем суддзяў.
Іншыя пасты карыстальніка
