Першы трафей беларусаў у сафійскім ЦСКА: Эбонг забіў пенальці, Лапавухаў перахітрыў дваіх – і добра адсвяткавалі
На фінал прыйшлі 37 тысяч гледачоў.
20 траўня сафійскі ЦСКА заваяваў Кубак Балгарыі – упершыню за пяць гадоў. У фінале супраць «Лакаматыва» з Плоўдзіва вельмі дапамаглі беларусы. Брамнік Фёдар Лапавухаў і паўабаронца Макс Эбонг правялі на полі 120+ хвілін (асноўны і дадатковы час скончыліся 1:1). Абодвух можна назваць і героямі серыі пенальці. Пасля няўдалай першай спробы ад партнёра, Эбонг рэалізаваў сваю, прабіўшы моцна амаль па цэнтру. Брамнік дакрануўся да мяча, але не адбіў.
А вось Лапавухаў з пяці ўдараў суперніка пацягнуў два. У самым пачатку серыі перахітрыў 37-гадовага Дзімітара Іліева – пры ўдары застаўся ў цэнтры, куды і паляцеў мяч. А пры пятай спробе «чыгуначнікаў» Лапавухаў паказаў рукой на правы ад сябе кут. Дзінеў прабіў у супрацьлеглы, але не ў самы кут. Беларус адбіў.
ЦСКА заставалася толькі рэалізаваць пятую спробу. Джэймс Эта’О забіў і разам з усёй камандай пабег святкаваць.
На трыбунах сафійскага стадыёна «Васіл Леўскі» прысутнічалі 37+ тысяч гледачоў. Паглядзіце, якія прыгожыя перформансы падрыхтавалі фаны ЦСКА.
А вось як «армейцы» паднімалі над галавой доўгачаканы трафей. Разам з Добры Дзімавым, легендарным адміністратарам, які працаваў у клубе яшчэ ў 80-х, пры Хрыста Стоічкаве.
Пасля перамогі фізіятэрапеўт Іван Хрыстаў пастаяў на галаве – гэта ўжо традыцыя.
Разам з Кубкам сафійцы, вядома, падышлі да заўзятараў. Футбалісты і трэнеры разам заспявалі з трыбунамі.
Пасля фіналу не хаваў эмоцый і Фёдар Лапавухаў. Беларускі брамнік даў інтэрв’ю на англійскай мове.
«Я вельмі шчаслівы і нават не ведаю, што сказаць. Самае галоўнае – што мы каманда, што мы ўсе разам і падтрымліваем адзін аднаго. Мы ўвесь час казалі, што пераможам і што іншага варыянту для нас няма.
Падчас матча не было часу шмат думаць – усё адбывалася вельмі хутка. Ты проста робіш тое, што можаш, усё на інстынктах. Я ведаў, што Дзімітар Іліеў часта б’е па цэнтры, таму вырашыў застацца на месцы. Але ў серыі пенальці заўсёды патрэбнае і шанцаванне.
Вялікі дзякуй заўзятарам – вы заўсёды падтрымліваеце нас і ў добрыя, і ў цяжкія моманты. Гэтая перамога – для вас», – сказаў брамнік.
На полі падчас святкавання была і жонка галкіпера Валерыя.
Лапавухаў правёў у Кубку Балгарыі 5 матчаў, у двух з іх не прапусціў. У Эбонга – 4 гульні. На яго рахунку важны гол у чвэрцьфінале ў браму «ЦСКА 1948» (2:0).
Іншыя пасты карыстальніка
