Беларусь усё яшчэ на дне рэйтынгу свабоды СМІ, хоць і трохі паднялася. Галоўнае пра новы спіс «Рэпарцёраў без межаў»

Арганізацыя «Рэпарцёры без межаў» апублікавала Сусветны індэкс свабоды прэсы за 2026 год. Беларусь паднялася ў ім на адзін радок. Але ёсць адзін нюанс. Месца нашай краіны па-ранейшаму вельмі нізкае – 165-е (з 180 дзяржаў). Умовы для працы журналістаў у Беларусі ацэньваюцца як «вельмі цяжкія». З суседзяў толькі Расія ніжэй (172). А вось Літва (15), Латвія (17), Польшча (27), Украіна (55) – даволі высока.

«Рэпарцёры без межаў» – міжнародная няўрадавая арганізацыя, якая абараняе журналістаў і медыяпрацаўнікоў ад пераследу і зняволення за іх працу. Яна асвятляе выпадкі гвалту і катаванняў, змагаецца супраць цэнзуры і абмежаванняў свабоды слова, а таксама падтрымлівае журналістаў і СМІ фінансава. Асобная ўвага – бяспецы тых, хто працуе ў зонах канфліктаў.

Ужо 10 гадоў запар лідарам рэйтынгу з’яўляецца Нарвегія. У топ-5 таксама Нідэрланты, Эстонія, Данія і Швецыя. На апошнім месцы – Эрытрэя. Аўтары падвялі вынік: за 25 гадоў збору звестак сярэдні рэйтынг краін яшчэ ніколі не быў такім нізкім. У большасці краін сітуацыя са свабодай прэсы цяжкая ці вельмі цяжкая.

Тыдзень таму ў выніку абмену з беларускай турмы вызвалены журналіст Анджэй Пачобут. Экс-палітвязень правёў за кратамі за сваю працу 1860 дзён. Паводле «Рэпарцёраў без межаў», у зняволенні ў Беларусі па-ранейшаму знаходзіцца 21 журналіст. Больш за 500 былі вымушаны з’ехаць з краіны ці працягваць працаваць употай.