Сабаленка гуляе матчы «Ралан Гарос» у вельмі дарагім упрыгожванні – вось колькі яно каштуе

На парыжскіх кортах працягваецца чарговы «Ралан Гарос». Першая ракетка свету без праблем прайшла два стартавыя кругі. Беларуска аказалася мацнейшай за іспанку Джэсіку Бузас Манэйра і францужанку Эльзу Жакмо. Пакуль, зрэшты, Сабаленка прыцягвае ўвагу не толькі сваёй гульнёй – суперніцы былі не з топу, – але і яркім вобразам. Дакладней, упрыгожваннямі. Беларуская тэнісістка ўжо двойчы выходзіла на корт у каралях з гранатамі вагой больш за 200 карат і 23 каратамі брыльянтаў.

Гэты кастомны набор брэнду Material Good, у склад якога ўваходзяць таксама завушніцы з белага золата, журналісты ацэньваюць прыкладна ў $110–150 тысяч долараў. На такія грошы можна купіць кватэру ў цэнтры Мінска.

«Цяжару брыльянтаў я таксама не адчуваю — хаця магу ўявіць, як гэта выглядае з боку. Увогуле ў мяне павінна было быць і трэцяе каралі, але я падумала, што гэта ўжо перабор. Для мяне важна добра выглядаць. Калі я добра выглядаю, то і выступаю лепш», – прызналася Арына Сабаленка.

На адной з прэс-канферэнцый беларуску запыталі і пра барацьбу за павелічэнне прызавых. Маўляў, яна гэта робіць гуляючы ў вельмі дарагіх рэчах. Вось што адказала тэнісістка на гэты выпад:

«Я наогул не разумею, як можна супастаўляць два зусім розныя паняцці. Як я ўжо казала, прызавыя датычацца не мяне. Я проста змагаюся дзеля гульцоў з нізкім рэйтынгам, якім сапраўды даводзіцца нялёгка выжываць у свеце тэніса. Тое, што я змагаюся за прызавыя, не мае да мяне ніякага дачынення. Усе ведаюць, што ў мяне ўсё добра. Мы змагаемся за сумленную долю даходаў, а таксама за гульцоў з ніжэйшым рэйтынгам, за тых, хто вяртаецца пасля траўм, і за тое, каб наступнаму пакаленню было лягчэй увайсці ў топ-10. Так што гэта не дзеля сябе».

Дарэчы, сваім вобразам у Парыжы вылучылася не толькі Сабаленка. Так, экс-першая ракетка японка Наомі Осака выклікала фурор сваёй сукенкай у выглядзе Эйфелевай вежы.

А вось легендарны серб з’явіўся на грунтавым турніры ў куртцы з... грунту. У прамым сэнсе: гэта сапраўдны грунт – сумесь гліны і пяску, сабраная з тэніснага корта і нанесеная на паверхню курткі пасля спецыяльнай апрацоўкі.

Такі незвычайны эксперымент зрабіў брэнд.

А які з гэтых эпатажных аксэсуараў вам падабаецца больш?