«Дачакаліся перамогі «Арсенала», дачакаемся і перамогі, якой так не хапае 30 гадоў». Гэтыя беларусы не гублялі надзеі
Важна верыць не толькі ў футболе.
«Арсенал» Артэты – чэмпіён. Для кагосьці гэта проста футбольная навіна, але для тысяч беларусаў – важная і доўгачаканая падзея. Большасць з іх памятаюць каманду Арсена Венгера і сезон без параз. За гэты час змянілася шмат: школы, універсітэты, эміграцыя, турмы, новыя краіны і новыя людзі побач. Але любоў да «кананіраў» засталася. Сабралі некалькі эмацыйных рэакцый на чэмпіёнства, якога беларускія заўзятары чакалі больш за два дзесяцігоддзі.
Беларускі журналіст Ягор Марціновіч узгадаў, як глядзеў матчы «Арсенала» ў СІЗА на Валадарцы разам з Сашам Івуліным. Экс-галоўрэд «Нашай Нівы» падтрымлівае «кананіраў» так даўно, што памятае іх папярэдняе чэмпіёнства.
Вядоўца шоў «Звычайная раніца» Марына Ментусава ў аторак глядзела матч «Манчэстэр Сіці» – галоўнага канкурэнта «Арсенала» – у бары і не дарэмна: каманда Пепа Гвардыёлы не змагла адолець «Борнмут» (1:1) і перастала прэтэндаваць на тытур. Кампанію Ментусавай складаў комік Ідрак Мірзалізадэ. Скончыўся прагляд бурным святкаваннем.
У сябе ў сацсетках вядоўца распавядала, адкуль у яе прыхільнасць да «Арсенала». Яшчэ дзяўчынкай як пацярпелая ад аварыі на атамнай электрастанцыі ў Чарнобылі яна пабывала на аздараўленні ў Нямеччыне. Там месяц пражыла ў сям’і, якая сачыла за лонданцамі. Справа была ў чэмпіёнскім сезоне-2003/04, у браме тады гуляў немец Енс Леман. Апекуны глядзелі футбол з такім энтузіязмам, што і малая беларуска ім зацікавілася. Ну а яе ўлюбёнай камандай стаў «Арсенал».
Сузаснавальнік ініцыятывы Maldzis, якая вяртае беларусам гістарычныя каштоўнасці, палітолаг Рыгор Астапеня прызнаўся, што пакуль ён чакаў чэмпіёнства, дачка паспела разлюбіць «Арсенал». Ён жа – верыў.
А беларускі драматург і мастацкі кіраўнік «Свабоднага тэатра» Мікалай Халезін нагадаў, што наперадзе яшчэ фінал Лігі чэмпіёнаў. Таму рэфлексія – пазней. Але чакаў ён 22 гады.
У сваіх сацсетках «Арсенал» таксама павіншавалі беларускія футбалісты Павел Савіцкі і Аляксей Рыас.
А вам спадабалася каманда Мікеля Артэты ў гэтым сезоне?
Іншыя пасты карыстальніка
