Кватэра, аўтамабіль, велізарная грашовая прэмія (беларускім чэмпіёнам плацяць нашмат менш) — казахстанскага фігурыста Шайдорава завалілі падарункамі пасля золата ў Мілане

Міхаіл Шайдораў — адзін з самых нечаканых пераможцаў Алімпіяды-2026. 21-гадовы казахстанскі фігурыст абышоў галоўнага фаварыта Іллю Малініна (ЗША), які двойчы ўпаў падчас вырашальнага пракату. Шайдораў жа выступіў бліскуча, заваяваўшы для сваёй краіны першае ў гісторыі золата Гульняў у фігурным катанні (и другое ва ўсіх зімовых відах).

Пасля такога поспеху спартсмен атрымаў мноства шчодрых падарункаў. Па-першае, грашовую прэмію ў 250 тысяч долараў ад дзяржавы. Па памеры выплат алімпійскім чэмпіёнам Казахстан уваходзіць у топ-10. Для параўнання: у Беларусі выплачваюць 150 тысяч. Шайдорава таксама ўзнагародзяць ордэнам «Барыс» ІІ ступені.

Але былі і сюрпрызы ад прыватных кампаній і асоб. Так, забудоўшчык Ulytau Group паведаміў у сацсетках, што падорыць чэмпіёну новую трохпакаёвую кватэру ў Астане — прыкладна за 90 тысяч долараў. Цікава, што летась Шайдораву ўжо дарылі кватэру ў родным Алматы, пасля другога месца на чэмпіянаце свету.

Вядомы казахстанскі спявак Дзімаш Кудайберген паабяцаў Шайдораву новы аўтамабіль. Менавіта пад песню «Confessa» ў яго выкананні фігурыст выступаў з адвольнай праграмай.

Матэрыяльныя падзякі атрымлівае і бацька алімпійскага чэмпіёна — Станіслаў Шайдораў. Прадпрымальнік Арсен Томскі (на здымку) паведаміў, што падорыць яму аўтамабіль Audi Q8. Бізнесмена натхніла гісторыя пра тое, як у 2018 годзе мужчына прадаў уласную машыну, каб забяспечыць сыну магчымасць трэніравацца.

На перамозе казахстанскага фігурыста піярацца ўсе, каму не лянота: ад промакодаў на падпіску ў анлайн-кінатэатры для заўзятараў да зніжак на замову піцы. Сам жа герой прызнаўся, што больш за ўсё яго развесяліў мем, дзе ён сядзіць з сур’ёзным тварам, а ніжэй подпіс: «Калі зразумеў, што табе каля дома пакладуць асфальт». Гэта адсылка да дзюдаіста Элдоса Сметава, якому пасля золата Парыжа-2024 акімат вобласці паклаў каля дома новы асфальт.

Ну а што — яны заслужылі. Залаты медаль Шайдорава пакуль адзіны ў Казахстана на зімовай Алімпіядзе-2026.