Чычкан сустрэўся з польскімі школьнікамі. А вось што ў яго з гульнявой практыкай у Кракаве

Антон Чычкан ярка пачаў у «Вісле». У 2024-м, праз некалькі месяцаў пасля пераезду ў Кракаў, ён заваяваў Кубак Польшчы, адгуляўшы 120-хвілінны фінал супраць «Пагоні» (Шчецын) – 2:1.

У наступным сезоне беларускі брамнік правёў сем матчаў у Д2, два ў Кубку краіны і яшчэ чатыры ў кваліфікацыі ЛЕ. У ліпені 2025-га Чычкан падпісаў новы кантракт з клубам, на год. Але з той пары ў яго ніводнага матча за першую каманду (чатыры гульні на лаўцы), якая дагэтуль выступае ў Д2. Так, летам здарылася траўма, але лячэнне доўжылася некалькі тыдняў.

У гэтым сезоне Антон Чычкан гуляе толькі за дубль «Віслы». У польскім Д4 ён правёў 8 матчаў, у якіх прапусціў 11 галоў. Няўжо гэта ўзровень для 30-гадовага гульца, які тройчы быў чэмпіёнам Беларусі ў складзе БАТЭ?

Затое, Чычкана прыцягнулі да сустрэчы з польскімі школьнікамі. Беларус разам з аднаклубнікам прыехаў у Забежув, што пад Кракавам, каб паразмаўляць з дзецьмі на розныя тэмы, зрабіць здымкі і раздаць аўтографы. На сустрэчы брамнік вельмі шмат усміхаўся.

Дарэчы, дома ў Чычкана расце сваё дзіця. Марку ў красавіку споўніцца год. У сваіх сацсетках футбаліст час ад часу паказвае сына.

«Вісла» з вялікім адрывам узначальвае табліцу польскага Д2. Кракаўскі клуб хутчэй за ўсё вернецца ў Экстракласу. Але ці дэбютуе там Чычкан – вялікае пытанне. Гульнявую практыку дзеляць маладыя палякі Леткевіч і Брода. А беларус грунтоўна сеў на лаўку запасных.