Экс-гулец мінскага «Дынама» выйграў гольф-турнір для амерыканскіх селебрыці, абагнаўшы зорку НБА Стэфа Кары
Мезін і Калюжны мусяць ацаніць.
Амерыканскі форвард Джо Павелскі заехаў у Беларусь усяго на тры месяцы падчас сезону-2012/13, пакуль у НХЛ разбіраліся з лакаўтам. Правёў за мінскае «Дынама» ў Кантынентальнай хакейнай лізе 17 матчаў – і выбіў 15 пунктаў. У адрозненні ад іншых энхаэлаўцаў, яму не спатрэбілася шмат часу, каб набраць абароты – Павелскі адразу стаў адным лідарам мінчукоў, але затрымаўся нядоўга.
Тым не менш мы помнім Павелскі – усё ж ён мае беларускую старонку ў біяграфіі. Хаця, канешне, куды больш сур'ёзныя справы рабіў у складзе «Сан-Хасэ», дзе набіў шмат рэкордаў, але так і не ўзяў Кубак Стэнлі і ўвогуле абышоўся без вялікіх хакейных тытулаў. Год таму хакеіст завяршыў кар'еру.
Але з клюшкай у руках ён на развітаўся – толькі замяніў хакейную на тую, якой гуляюць у гольф. І ў гольфе з трафеямі амаль адразу ўсё пачало складвацца значна лепш.
Яшчэ ў лютым гэтага года Павелскі стаў пераможцам буйнога гольф-турніру для знакамітасцяў Hilton Grand Vacation.
А 14 ліпеня Павелскі выйграў American Century Championship. Гэта яшчэ адзін гольф-турнір для знакамітасцяў, і ён лічыцца найбуйнейшым у ЗША.
American Century Championship ад тэлекампаніі NBC Sports праводзяць у фармаце «стэйблфорд» – у адрозненні ад звычайнага, дзе проста трэба прайсці дыстанцыю за меншую колькасць удараў, тут падлічваюць пункты. Колькасць атрыманых балаў залежыць ад колькасці ўдараў спартсмена на адной лунцы у параўнанні з загадзя абумоўленай.
Напрыклад, загадзя вырашылі, што на праход лункі №1 патрэбна 4 удары. Калі гальфіст скарыстаў на 3 менш (такі варыянт называюць «альбатрос») – гэта, паводле правіл, «+10» пунктаў у скарбонку. На 2 удары менш («ігл») – «+6». На адзін («бёрдзі») – «+3». Калі спартсмен выкарыстаў абумоўленае чысло ўдараў, налічваецца «+1» бал («пар»). У выпадку, калі было скарыстана на адзін удар больш («богі»), удзельнік пунктаў не зарабляе. А калі на два і больш («падвойны богі») – атрымлівае «-2» у залік.
Дык вось. У гэтым годзе на American Century Championship выступалі 90 знакамітасцяў. Яны прайшлі 3 раўнды па 18 лунак – 54 агулам. Павелскі фінішаваў з 73 пунктамі, дапусціўшы толькі 2 «падвойныя» і 4 адзінкавыя «богі», з 12 «бёрдзі» і нават адным «іглам» (усё астатняе – «пары»). Выглядае нядрэнна як для аматара.
Былы дынамавец набраў на 9 пунктаў больш за бліжэйшага праследавальніка Джона Смольца (чалец «Залы славы бейсбола»). Таксама ў топ-5 трапілі кантры-спявак Джэйк Оўэн, экс-футбаліст зборнай ЗША Тэйлар Туэлмен і дзейны баскетбаліст «Голдэн Стэйт» Стэфэн Кары.
Гольф-поспех прыйшоў да Павелскі не знянацку.
Па-першае, «спортам для багацеяў» ён захапляецца даўно. У адным з даўніх інтэрв'ю, напрыклад, распавядаў, што браў урокі яшчэ ў дзяцінстве і ў 9-м класе нават надаў большы прыярытэт менавіта заняткам гольфам, чым культаваму для ЗША бейсболу. Такі вось «Капітан Амерыка» (Павелскі носіць гэтую мінушку).
Гольф суправаджаў спартсмена і падчас хакейнай кар'еры як спосаб «бяспечна і прыемна» пабавіць час пасля трэнінгаў.
Павелскі на American Century Championship-2018
Па-другое, Павелскі рэгулярна ўдзельнічае ў American Century Championship з 2016 года і мае за плячыма ўжо дзевяць турніраў, у якіх не фінішаваў ніжэй за 12-е месца, а восем разоў уваходзіў у дзясятку найлепшых.
Тры папярэднія турніры Джо ўвогуле скончыў у топ-3: двойчы станавіўся другім (2022, 2024) і адзін раз трэцім (2023). Цяперашняя перамога стала сапраўды доўгачаканай, таму эмоцыі пасля вырашальнага ўдару цалкам зразумелыя.
З тытула ішлі прыгожыя падарункі. 11 ліпеня, за тры дні да перамогі, экс-хакеіст адсвяткаваў 41-годдзе. А 13 ліпеня адзначаў 17-ю гадавіну жаніцьбы.
– Нават не ведаю, што сказаць. Тыдзень атрымаўся неверагодным. Гэта перамога значыць для мяне вельмі шмат, – заявіў шчаслівы Павелскі.
Бонусам да кубка Павелскі атрымаў 150 тысяч долараў прызавых. Таксама экс-хакеіст мінскага «Дынама» стаў толькі трэцім прадстаўніком НХЛ, які выйграў American Century Championship. Да Павелскі гэта рабілі Дэвід Куін (цяперашні трэнер «Рэйнджэрс») і легендарны Марыё Лем'е. Папярэдні пераможны турнір, Hilton Grand Vacation, праходзіў у тым жа фармаце, але за перамогу экс-хакеіст атрымаў крыху менш – 100 тысяч долараў.
Вядома, гэтыя грошы не параўнаць з заробкамі ў НХЛ, але прыбаўка да пенсіі добрая.
Што да гальфістаў у беларускім хакеі, то адразу можна прыгадаць двух славутых экс-гульцоў зборнай. Форвард Аляксей Калюжны калісьці распавядаў, што любіць гуляць з сынам. А брамнік Андрэй Мезін хоць і казаў, што не імкнецца да значных вынікаў у гольфе, неяк нават трапляў у прызы аматарскага турніру, які ладзіўся ў Літве – займаў там 2-е месца ў адной з катэгорый.
Іншыя пасты карыстальніка
