Каралёк згуляў, як піжон, на апошніх секундах матчу – праз гэта яго «Кельцы» страцілі перамогу ў Лізе чэмпіёнаў
А ў першым тайме закінуў фантастычны мяч.
У 7-м туры гандбольнай Лігі чэмпіёнаў «Кельцы» сустракаліся з «Ольбаргам». Польскі клуб амаль увесь матч выдатна змагаўся з моцнымі датчанамі, якія ідуць на другім месцы ў групе А (усяго там восем каманд). Добра дзейнічаў і Арцём Каралёк. Беларускі лінейны закінуў 5 галоў у вароты аднаго з найлепшых гандбольных брамнікаў Нікаласа Ландзіна. Прычым адзін з мячоў адправіў у сетку, знаходзячыся спінай да варот. Прыгажосць!
А ў самай канцоўцы напружанага матчу «Кельцы» вялі 32:31. За пяць секунд да фінальнай сірэны з мячом каля 6-мятровай лініі суперніка аказаўся Каралёк. Перад ім – толькі брамнік. І беларус у гэты адказны момант вырашыў па-піжонску кінуць «парашутам». Выкананне элементу атрымалася няўдалым. Ландзін лёгка злавіў мяч ды пачаў атаку, якая завяршылася голам на апошняй секундзе – 32:32. Вось дык драма! Скамейка «Кельцаў» паказвала, што час скончыўся, але гэтыя апеляцыі былі марнымі.
«Кельцы» ў выніку зарабілі толькі адзін пункт. Яны ідуць на 6-м месцы ў табліцы, якое ўсё ж выводзіць у 1/8-ю турніру.
Іншыя пасты карыстальніка
