Прэзідэнт Чэхіі падтрымлівае сваіх у Італіі і паказвае сябе ў хакеі. Стаў сведкам золата суайчынніцы ў сноўбордзе

Зборная Чэхіі па хакеі няўдала стартавала на зімовых Гульнях-2026, без шансаў саступіўшы канадцам 0:5. Зрэшты, выправіць сітуацыю яшчэ можна – наперадзе матчы з не такімі грознымі Францыяй і Швейцарыяй. Тым больш, у плэй-оф з групавога этапу трапляюць усе каманды (найлепшыя адразу ў 1/4). Чэшскіх хакеістаў у сваіх сацсетках падтрымлівае прэзідэнт краіны Пётр Павел. Ён – вялікі аматар матацыклаў. Але ў хакей таксама гуляе вельмі добра. Калісьці расказваў, што захапляўся ім у дзяцінстве. Свае скілы на лёдзе палітык прадэманстраваў у спарынгу падчас Алімпіяды. Выглядае больш бадзёрым, чым адзін дыктатар (у іх сем гадоў розніцы), ці не праўда?

ВІДЭА

Павел паспрабаваў сябе і ў кёрлінгу. Тады як яго жонка ўзяла ў рукі біятлонную вінтоўку.

Прэзідэнт Чэхіі быў заўважаны і сярод заўзятараў на алімпійскім сноўбордзе. Ён вельмі аддана, са сцягам, падтрымліваў 22-гадовую чэшку Зузану Мадэраву. У выніку тая ўзяла золата ў паралельным гіганцкім слаламе. Хаця ў Пекіне чатыры гады таму была толькі 23-й.

Па выніках на раніцу 13 лютага Чэхія з двума медалямі (было яшчэ срэбра ў канькабежным спорце Метадэя Йілека) ідзе на 12-м месцы ў медальным заліку. Нядрэнна для краіны з насельніцтвам крыху больш, чым у Беларусі.