Урокі і фізічная актыўнасць на глыбіні 7 метраў. Ва Украіне пабудавалі дзясяткі падземных школ — там не чуваць ні выбухаў, ні сігналаў паветранай трывогі

Украіна жыве ва ўмовах поўнамаштабнай вайны амаль чатыры гады. Пад ударамі з боку Расіі — усё, у тым ліку адукацыя. З лютага 2022 года пашкоджана або разбурана больш за 1,8 тысячы школ. Гэта амаль кожная сёмая школа ў краіне. Дзеці з прыфрантавых населеных пунктаў вымушаныя вучыцца анлайн, што адбіваецца і на саміх школьніках (яны становяцца больш закрытымі), і на якасці іх адукацыі.

Украінскія ўлады спрабуюць вырашыць праблему будаўніцтвам «падземных» школ. Адну з іх нядаўна паказаў блогер і былы футбаліст Зміцер Паваразнюк.

ВІДЭА

Футбольная пляцоўка — на адкрытым паветры, а вось настольным тэнісам дзеці займаюцца ўжо на глыбіні 7 метраў. Будаўніцтва такіх падземных аб’ектаў працягваецца ў Харкаве, Запарожжы, Крывым Рогу і на Херсоншчыне. Фінансавую падтрымку аказваюць міжнародныя партнёры. У студзені першы намеснік кіраўніка МАН Яўген Кудравец паведамляў, што ўжо адкрыта 96 школ (першая — у 2023 годзе), у планах — 221. У кожнай прадугледжаныя канферэнц-зала і зона актыўнага адпачынку з аэрахакеем, баскетболам і аэрафутболам. Аўдыторыі абсталяваныя мультымедыйнымі дошкамі, інтэрактыўнымі панэлямі і сучаснай мэбляй.

Школа-бункер паводле праекта ЮНІСЕФ разлічана на навучанне прыкладна 800-900 дзяцей у дзве змены. Памяшканні абсталяваныя сістэмай вентыляцыі і ачысткі паветра. Сцвярджаецца, што збудаванне здольнае вытрымаць удары ракет і авіябомбаў. Аднак спадзяёмся, што гэты факт ніколі не давядзецца правяраць.

Галоўнае, што маленькія ўкраінцы знаходзяцца ў бяспецы. Такія школы — унікальны вопыт. Асобныя памяшканні для ўкрыцця дзяцей ёсць і ў Ізраілі, і ў Сірыі (з-за абстрэлаў), а таксама ў ЗША (тарнада) і Японіі (землятрасенні). Аднак гэта, як правіла, не падземныя навучальныя ўстановы, а хутчэй комплексы ахоўных збудаванняў.