Сабаленка збіраецца ў Маскву? Пра планы сустрэцца з ёй там расказаў скандальны блогер, на якога наязджалі расійскія дэпутаты за «жаночы» вобраз
Першая ракетка даўно не была ў Расіі.
Карына Мурашкіна – расійская медыйная асоба, якая пачынала як інтэрнэт-блогерка і паступова прыйшла да фармату ўласных забаўляльных праектаў. Найбольшую вядомасць ёй прынесла шоу «Плёткі», пабудаванае на абмеркаванні чутак і гісторый з жыцця публічных людзей. У ім важная не столькі сенсацыя, колькі атмасфера нефармальнай размовы. У адным з нядаўніх выпускаў вядучая расказала пра падабайкі ад Арыны Сабаленкі. Мурашкіна не ведала, што першая ракетка свету з Беларуcі.
Суразмоўцам Мурашкінай у гэтым выпуску «Плётак» стаў Аляксей Жыдкоўскі – вядомы блогер з Санкт‑Пецярбурга, які праславіўся дзякуючы яркаму стылю, вялікай колькасці падпісантаў у Instagram і відэа з б’юці‑парадамі і жартоўнымі гісторыямі. Ён часам эксперыментуе са знешнім выглядам і ўласнай ідэнтычнасцю, што таксама прыцягвае ўвагу і дыскусіі вакол яго постаці. Менавіта Жыдкоўскі і расказаў пра дамоўленасць сустрэцца з Сабаленкай у Маскве. Дарэчы, сама тэнісістка прыйшла ў каментары да відэа.
Адзначым, што Жыдкоўскі ў 2025-м годзе быў уцягнуты ў скандал. Блогер выступіў чытачом на «Татальным дыктанце» ў Маскве, што выклікала вялікі рэзананс. Некаторыя расійскія дэпутаты і грамадскія дзеячы заявілі, што яго ўдзел у мерапрыемстве з’яўляецца нібыта прапагандай ЛГБТ. Асобныя палітыкі нават звярнуліся ў Генпракуратуру, на чым гісторыя скончылася.
Што да Сабаленкі, то яе апошні (вядомы нам) візіт у Расіі адбыўся задоўга да поўнамаштабнага ўварвання арміі Пуціна ва Украіну. У 2017-м беларуска згуляла на Neva Cup у Санкт-Пецярбургу (вылецела ў чвэрцьфінале ад украінкі Ястрэмскай). Вось як яна тады выглядала.
Няўжо першая ракетка свету сапраўды неўзабаве наведае Маскву? Адзначым, што турніры WTA у Расіі з 2022 года не праводзяць.
Іншыя пасты карыстальніка
