Чэмпіён Беларусі і Польшчы па вольнай барацьбе быў арыштаваны за ўхіленне ад службы ў войску, а цяпер знік без вестак

Маці беларускага барацьбіта Віктара Шмуляя аб’явіла ў сацсетках, што яе сын знік, заўважыла «Наша Ніва». Вось што яшчэ яна паведамляе пра драматычны лёс колішняга спартсмена.

Віктар Шмуляй займаўся вольнай барацьбой з дзяцінства і прымаў удзел у спаборніцтвах спачатку ў Беларусі, а пазней — у Польшчы.

У 2013 годзе ён выступаў на ЧЕ ў складзе юнацкай зборнай Беларусі. Таксама ездзіў на міжнародныя турніры сярод кадэтаў, юніёраў і моладзі. Найбольш значным дасягненнем Шмуляя стала восьмае месца на чэмпіянаце Еўропы сярод спартсменаў да 23 гадоў у 2018-м. Спартсмен двойчы станавіўся чэмпіёнам Польшчы (2017, 2019), у 2018-м заваяваў срэбра, а ў 2016-м — бронзу. Таксама ён быў віцэ-чэмпіёнам Польшчы сярод моладзі ў 2017 і 2018 гадах і перамог на юніёрскім чэмпіянаце краіны ў 2016 годзе.

Маці Віктара, Вікторыя, нагадала пра яго спортыўныя дасягненні, а таксама пра тое, што сям’я раней перавезла Віктара ў Варшаву, каб пазбегнуць прызыву ў беларускую армію.

У 2023 г. Віктар вярнуўся ў Беларусь, але яго затрымалі і за ўхіленне ад прызыву ў войска далі паўтара месяца арышту. Па словах маці, праблемы з алкаголем і наркотыкамі ў хлопца з’явіліся яшчэ да вяртання на радзіму і паступова пагаршаліся.

Жыццё Віктара пасля гэтага стала цяжкім: сям’я часта знаходзіла яго ў жудасным стане, ім даводзілася прыводзіць яго дадому і дапамагаць, але сітуацыя крыху змянялася. Быў перыяд, калі ён нават знайшоў адносіны і меў падтрымку дзяўчыны, у якой быў свой бізнэс. Але, паводле маці, сын кінуў яе і працягнуў шкодныя звычкі.

Два месяцы таму Віктар знік, калі бацькі паспрабавалі ўвесці больш строгія правілы і перасталі даваць яму грошы. Судзячы па пастах яго маці, яна вельмі цяжка перажывае яго знікненне, хаця спачатку ёй падалося гэта палёгкай.

Вікторыя змеркавала, што на гэты раз Віктар збег у Польшчу, бо яго «прыціснула» міліцыя. Мужчына мае польскае грамадзянства, бо яго бацька – паляк. Жанчына напісала, што сям’я адмаўляецца ад актыўных пошукаў і будзе спрабаваць жыць сваё жыццё. Аднак яна ўсё яшчэ чакае сына дома.