Клуб з Д4 Польшчы прадраўся ў паўфiнал Кубка Польшчы – вось якім бокам тут беларус

«Завiша» з Быдгашчы – галоўная сенсацыя Кубка Польшчы 2025/2026. Каманда з Д4 прайшла ў турніры ўжо чатырох супернікаў: «Тыхы» з Д2 (2:0), «Вікелец» з Д4 (3:0), кракаўскую «Віслу» Антона Чычкана з Д2 (4:1) і «Хайнічанку» з Д3 (1:1, пенальці 6:5). Так андэрдог нечакана аказаўся ў паўфінале турніру.

«Завiша» не заўсёды была ў такім глыбокім міноры. Яна правяла 14 сезонаў у Д1 і нават брала Кубак і Суперкубак Польшчы ў 2014 годзе. У студзені 2015-га да гэтай польскай каманды далучыўся Іван Маеўскі. Беларускі паўабаронца перайшоў з «Мінска» і правёў у Экстракласе 18 матчаў (1 гол). Праўда, па выніках таго сезону «Завiша» заняла апошняе месца і пакінула Д1. І больш туды па сёння не вярталася. Так беларус заспеў апошні элітны сезон каманды.

Маеўскі не застаўся ў Польшчы, а пасля вылету паехаў у расійскі «Анжы». У «Завішы» тым часам пачаліся складаныя часы. Праз фінансавыя праблемы яна была вымушаная пачынаць шлях з самых нізоў. А Маеўскі, для якога Быдгашча быў першым легіянерскім вопытам, нядаўна стаў галоўным трэнерам славенскага «Цэле», з якім рыхтуецца да 1/16 фіналу Лігі канферэнцый.

Як там беларускія трэнеры за мяжой: таргі ў Жукоўскага, снежны Дулуб, Маеўскі ідзе па золата

Апроч Маеўскага ў «Завішы» гулялі яшчэ двое з Беларусі, прычым абодва ў першай палове 90-х пераходзілі з магілёўскага «Дняпра». Міхаіл Смірноў правёў 11 матчаў (1 гол), а Юрый Малееў ажно 86, ды яшчэ забіў 14 мячоў. Апошні доўгі час паралельна ўзначальваў жаночую зборную Беларусі і «Дынама-БДУФК», аднак са студзеня 2025-га працуе толькі ў клубе.

Што да «Завішы», то ў сваёй групе Д4 яна ідзе другой. На два пункты больш мае «Палонія» (Срода). А вось у Кубку Польшчы пакуль усё складваецца ідэальна. У паўфінале выскачкі могуць трапіць на «Катавіцы» Іллі Шкурына. Лёсаванне адбудзецца 6 сакавіка.