Трэнер з 13 курткамі, прызнанне ў здрадзе ў прамым эфіры і лыжнік-«пінгвін» – самыя вар’яцкія моманты Алімпіяды ў Італіі
«Я аблажаўся»
Зімовыя Гульні ў Італіі падарылі не толькі медалі і рэкорды, але і сюжэты, якія хочацца пераглядаць асобна ад стартаў. Мы ўжо расказвалі пра тых спартсменаў, якія запомніліся найбольш, у першай частцы. Сабралі галоўныя кур’ёзы Алімпіяды – ад фраз, што ўжо сталі мемамі, да медалёў, якія літаральна развальваліся ў руках.
Эпатажная Юта, «шлем памяці» Герасекевіча ды трыўмф Клэба і кампаніі. Героі Алімпіяды-2026
«Я аблажаўся»
Амерыканскі фігурыст Ілля Малінін лічыўся галоўным фаварытам гэтых Гульняў. Аднак у самы адказны момант здарылася неверагоднае – 21-гадовы спартсмен двойчы ўпаў на адносна простых элементах і заняў толькі 8-е месца. Золата дасталося казахстанцу Міхаілу Шайдараву, а фраза Малініна, якой ён падсумаваў свой выступ, увайшла ў фонд залатых цытат Алімпіяды – «Я аблажаўся».
Нестандартны фініш
У кваліфікацыі шорт-трэка на 500 м у змешанай эстафеце італьянец П’етра Сігель фінішаваў… азадкам наперад. На апошнім павароце адбылося масавае сутыкненне – амаль палова ўдзельнікаў апынулася на лёдзе. Сігель устаяў і здолеў перасекчы фініш спінай наперад. Відэа з гэтым эпізодам сабрала больш за 1,4 млн праглядаў у сацсетках. У выніку італьянец дайшоў да фіналу і ўзяў золата.
Нарвежская драма
Нарвежскі біятланіст Стурла Хольм Лагрэйд выйграў бронзу ў індывідуальнай гонцы на 20 км – свой першы асабісты алімпійскі медаль. Але абмяркоўвалі не вынік, а інтэрв’ю пасля фінішу. У жывым эфіры ён прызнаўся, што за тры месяцы да Гульняў здрадзіў дзяўчыне і назваў гэта «самай вялікай памылкай». На наступны дзень у прэсе з’явілася яе заява пра тое, што дараваць гэта «вельмі складана». У выніку асабістая гісторыя стала часткай алімпійскай павесткі.
Сабака на трасе
Падчас кваліфікацыі каманднага спрынту ў жаночых лыжных гонках на трасу выбег Назгул – двухгадовы чэхаславацкі вольфдог з мясцовага гатэля. Пёс бадзёра рвануў да фінішу следам за харваткай Тэнай Хаджыч, а сама спартсменка спачатку нават не зразумела, што адбываецца. Вынік Назгулу, вядома, не залічылі – яго хутка вывелі з трасы, але гледачы былі ў захапленні.
Медалі, якія не вытрымалі
Амерыканка Брызі Джонсан заўважыла, што яе залатая медаль адарваўся ад стужкі проста на подыуме. Пазней пра дэфекты заявілі і іншыя прызёры: у нямецкага біятланіста Юстуса Штрэлова і фігурысткі Алісы Лю зламалася мацаванне. Шведка Эбба Андэрсан паведаміла, што яе медаль увогуле раскалоўся пасля падзення.
«Медалю стужка не патрэбная» – што на Гульнях адбываецца з ўзнагародамі?
Трэнер з 13 курткамі
Яшчэ адным героем Гульняў стаў французскі трэнер Бенуа Рышо, які змяняў курткі літаральна кожныя некалькі хвілін – усё праз колькасць сваіх падапечных. 38-гадовы спецыяліст працуе адразу з 16 фігурыстамі з 13 краін – Францыі, Германіі, Грузіі, ЗША, Канады, Мексікі, Японіі, Паўднёвай Карэі, Кітая, Швейцарыі, Італіі, Балгарыі і Эстоніі.
Кожны раз, калі на лёд выходзіў яго спартсмен, Рышо надзяваў куртку адпаведнай зборнай. За турнір ён змяніў 13 розных куртак, часам – некалькі разоў запар.
Лыжнік-«пінгвін»
Пасля першай спробы ў мужчынскім слаламе з вялікім адрывам лідараваў нарвежац Атле Ліе Макграт. У другой ён стартаваў апошнім, ведаючы, што медаль амаль у кішэні – трэба было толькі чыста прайсці трасу ў значна лепшых, сонечных умовах.
Але на адных з варот Макграт памыліўся, зразумеў, што шанец страчаны, шпурнуў палкі за межы трасы і сышоў у лес, дзе нейкі час ляжаў у снезе, закрыўшы твар рукамі. У сацсетках жартуюць, што гэта гатовая ілюстрацыя мема пра нігілістычнага пінгвіна.
Самы яркі заўзятар
Адным з самых запамінальных заўзятар Алімпіяды стаў журналіст з Славеніі Аляксандр Яворнік. Ён падтрымліваў сваіх суайчыннікаў у ярка-зялёным пінжаку, такой жа фуражцы і акулярах у колерах нацыянальнага сцяга. А ў сацсетках актыўна дзяліўся фота з славенскімі прызёрамі.
Іншыя пасты карыстальніка
